ने. सं. ११४४ कौलाथ्व एकादशी - चालं

असं क्वथुननि संरक्षण यायेत माग

येँ(नेपालभाषा टाइम्स)- असं क्वथुननि बचाउ अभियानं ऐतिहासिक व पुरातात्विक महत्वं जाःगु असं क्वथुननि संरक्षण यायेत सरकार समक्ष माग याःगु दु । अभियानं आः नकतिनि भूमि व्यवस्था तथा सहकारी मन्त्री रन्जिता श्रेष्ठ चौधरीयात असं क्वथुननिया स्थलगत निरीक्षण याकाः उगु लागाया संरक्षण यायेत माग यासें थ्व सम्बन्धी प्रतिवेदन नं लःल्हाःगु खः ।

उगु इलय् अभियानया संयोजक नमस्ते साय्मिं असं क्वथुननि संरक्षणया निंतिं जुयाच्वंगु गतिविधिया बारे जानकारी बियादीगु खः । संयोजक साय्मिं गुथियारत प्रभावय् लानाः मौलिक सम्पदायात छुट गुथिया नामय् निजी रैकर उल्लखे यानाः याःगु व नक्कलि पुर्जा तकं दयेकूगु जानकारी बियादीगु खः ।

संयोजक साय्मिं छुं दँ न्ह्यःतक अस्थिर राजनीतिया लबः कयाः उगु थाय्या मौलिकता स्यंकाः व्यावसायिक भवन दयेकेगु योजनातकं दयेकूगु जानकारी मन्त्री श्रेष्ठयात बियादीगु खः । ८ आना २ पैसाया निर्माण जुयाच्वंगु वायु देवता गुथि नामं नं म्हसीया वयाच्वंगु उगु ऐतिहासिक व पुरातात्विक महत्वया सम्पदा संरक्षण यायेत वय्कलं माग यानादीगु दु ।

प्रतिवेदन लःल्हाना कासें भूमि व्यवस्था तथा सहकारी मन्त्री रन्जिता श्रेष्ठ चौधरीं क्वथुननिया बारे थःगु ध्यानाकर्षण जूगु धसें थ्व सम्बन्धय् सत्यतथ्य थुइकेगु कुतः यायेगु बचं बियादीगु खः ।

छगू फरक प्रसंगय् मन्त्री श्रेष्ठं येँया पुलांगु बस्ती दुनेया स्वबासीतय् अवस्था व समस्यायात कयाः नं चिउताः तयादीगु खः । स्वनिगःया सभ्यताया संरक्षण याना वयाच्वंपिं स्थानीयवासीतय् स्वाबासी पुर्जा सम्बन्धी समस्या ज्यंकेगु सम्बन्धय् ज्या जुयाच्वंगु खँ कनादिसें उकिया निंतिं अधिकार सम्पन्न आयोग गठन यानाः स्वबासीतय्त लालपुर्जा वितरण यायेगु जुइ धयादिल ।

उगु इलय् नेवाः देय् दबूया न्वकूलिसें स्वनिगःया इन्चार्ज उमेश स्थापित, बागमति प्रदेश सांसद समिता खड्गीया नं उपस्थिति दुगु खः । अशोक वृक्ष विहारया नामं नं म्हसिउगु असं क्वथुननिइ न्यासः दँ स्वयां पुलांगु अमिताम्भ बुद्धया मूर्तिलिसें मेमेगु आपालं पुरातात्विक महत्वया ज्वलंत दु ।