याकनं ताँ दयेकेत माग

येँ(नेपालभाषा टाइम्स)- येँ महानगरपालिका १५ व १९ वडा स्वाइगु थनया कंगः अजिमा द्यःया न्ह्यःनेसं च्वंगु ताँ याकनं दयेकेत जनप्रतिनिधितसें माग याःगु दु । येँ महानगरपालिका १९ वडाअध्यक्ष राजेशकुमार श्रेष्ठलिसें वडा सदस्यपिं चन्द्रमान डंगोल, दिनेशमान जोशी रेणुकमल शाही, रंजिता परियार लगायतं याकनं ताँ दयेकेत माग यानादीगु खः ।

विष्णुमति खुसि च्वसं च्वंगु ताँपाखें जोखिम अप्वयेवं करिब निला न्ह्यः ताँ लिकाःगु खः । ताँ छ्वासुया वनाः विष्णुमति कोरिडोर जुयाः वये वने याइगु सवारी साधनयात तकं जोखिम अप्वयेवं न्हूगु ताँ दयेकेगु तयारी मजूसां पुलांगु ताँ लिकाःगु खः ।
वंगु न्यादँ खुदँ न्ह्यःनिसें तःक्वः तःक्वः मर्मत यानाः संचालन यानाच्वंगु खःसा आः वयाः अतिकं जोखिम अप्वःगु धासें ताँ लिकाःगु खः । ताँ लिकायेवं

उगु लँपु जुयाः वये वने याइपिं स्थानीवासीयात तसकं असहज जूगु दु ।
ताँ लिकायेवं विष्णुमतिया ताँ जुयाः वये वने याइपिंत असहज जूगु धासें १९ वडाया जनप्रतिनिधित थौंकन्हय् ‘सस्पेन्सन ब्रिज डिभिजन’यात इनाप यानाच्वंगु दु ।

तःक्वः तःक्वः मर्मत याना नं ताँ छ्वासुइगु म्हो मजूगुलिं न्हूगु ताँ दयेकेगु तयारी मजुइकं हे पुलांगु ताँ लिकायेत बाध्य जुइमाःगु जनप्रतिनिधितय् धापू दु ।