जनगणनाया कार्यतालिका स्वीकृत

येँ – राष्ट्रिय जनगणना निर्देशक समितिं राष्ट्रिय जनगणना २०७८ या कार्यतालिका स्वीकृत याःगु दु। राष्ट्रिय योजना आयोगया उपाध्यक्ष प्रा. डा पुष्पराज कँडेलया अध्यक्षताय् म्हिगः बिहिवाः च्वंगु बैठकं उगु कार्यतालिका स्वीकृत याःगु खः । लिसें उगु बैठकय् राष्ट्रिय जनगणना २०७८ लिसें जनगणनाया फुक्कं विवरण दइगु कथं विभागया सव डोमेन स्थायी वेबसाइटया रुपय् च्वनीगु censusnepal.cbs.gov.np या राष्ट्रिय योजना आयोगया सदस्य डा. रामकुमार फुँयालं सार्वजनिक याःगु दु। कार्यतालिका कथं थ्व हे असार १५ गते निसें जनगणनाया प्रश्नावली तयारी सुरु यानाः स्थानीय तहअनुसार जनगणनाया तालिम, तथ्यांक प्रशोधन केन्द्रया तयारी, अनलाइन पाखें गणक व सुपरीवेक्षकया आवेदन, उमित तालिम, जिल्लाया जनगणनाया सामग्री जिल्ला जिल्लाय् छ्वयेगु जनगणनाया प्रदेश व जिल्ला जनगणना कार्यालय स्थापना यायेगु, प्रारम्भिक व अन्तिम लिच्वः व २०८० वैशाख दुने विषयगत प्रतिवेदन सार्वजनिक यायेगु लक्ष्य तयातःगु दु ।