सहकारी बैंकं त्यासाया ब्याज क्वपाल

यल (नेपालभाषा टाइम्स) – राष्ट्रिय सहकारी बैंकं सदस्य सहकारी संस्थायात बीगु त्यासाया ब्याज क्वपाःगु दु । संस्थां सदस्य सहकारी संस्थायात बिया वयाच्वंगु त्यासाया ब्याज क्वालाः ७ दशमलव ५ प्रतिशत कायम याःगु दु ।

बुधवाः च्वंगु बैंक संचालक समितिया बैठकं त्यासाया ब्याज दरय् क्वपालेगुया नापं व्यवस्थापन शुल्कय् नं परिमार्जन याःगु दु। व्यवस्थापन शुल्क ० दशमलव ५ प्रतिशत तक कायम याःगु दु । बैंकं त्यासाया ब्याज दर क्वपाःसां नं बचतया ब्याज दर धाःसा क्वपाःगु मदु । वंगु भदौ महिनाय् छगू अंकया त्यासा दयेकूगु बैंकं पुस १० गतेनिसें लागू जुइकथं न्हूगु प्यंगू त्यासाया प्रकार तयार यानाः उकिया न्यूनतम ब्याजदर ७ दशमलव ५ प्रतिशत कायम याःगु खः । बैंकं त्यासाया प्यंगू न्हूगु प्रकारय् सबल सहकारी त्यासा, गरिबी निवारण त्यासा, अल्पकालीन व्यवसायिक त्यासा व व्यवसायिक किस्ताबन्दी त्यासा कायम यानाः ७.५ निसें ९.५ प्रतिशत ब्याज कायम याःगु खः ।

बैंकया अध्यक्ष के.बी. उप्रेतीं सहकारी क्षेत्रया गुगुं नं संघसंस्था ब्याजया कारणं त्यासाया निंतिं मेमेगु निकायय् वनेमाःगु अवस्थायात चिइकेगु व संरक्षित पूँजी फिर्ता कोष्या फाइदा व महत्वया अनुभूति याकेत कुतः यानाच्वनागु जानकारी बियादिल । बैंकया प्रमुख कार्यकारी अधिकृत बद्रीकुमार गुरागाइँ नं बैंकं वंगु आर्थिक दँय् याःगु कारोबारपाखें सदस्य संस्थायात १५ प्रतिशत मुनाफा वितरण यानागु जानकारी बियादिल ।