प्रतिभा समाजं विद्यार्थीतय्त सफू इन

यल – प्रतिभा समाजं तगिं ११ व १२ गूया विद्यार्थीपिं लाभान्वित जुइकथं सफू इनेज्या याःगु दु । थनया कोपुण्डोलस्थित सातोआकी भवनय् च्वंगु समाजं छगू बःचाधंगु ज्याझ्वःया दथुइ ११ व १२ गू तगिंया नीम्ह विद्यार्थीयात निःशुल्क रुपं सफू इनेज्या याःगु खः ।

विद्यार्थीत थःपिं नियमित रुपं अध्ययन यानाच्वंतले सितिकं उपलब्ध याकेगु व अध्ययन सिधयेकाः समाजयात हे लित बी हयेकथं समाजं थुकथं खुल्ला रुपं सफू वितरण याना वायाच्वंगु खः ।
दँय्दसं विद्यार्थीतय्त थुकथं सफू इना वयाच्वंगु समाजं थुगुसी त्रिरत्न कोषया ग्वाहालिं विद्यार्थीतय्त सफू इनेज्या याःगु खः ।

ज्याझ्वलय् थःगु नुगःखँ तयादिसें संस्कृतिविद् डा. चुन्दा वज्राचार्यं येँ महानगरपालिकां महानगरया मौलिक कला, संस्कृति भाषा, जात्रा, पर्व ल्यंका तयेत नेपालभाषाया माध्यमं स्थानीय पाठ्यक्रम तयार यानाः थःगु मातहत दुने लाःगु दक्वं ब्वनेकुथिइ ब्वंकेगु शुरु याःगु तसकं च्वछायेबहगु ज्या जूगु खँ कनादिल ।

वय्कलं स्थानीय पाठ्यक्रम तसकं ज्या वःगु विषय जूगु खँ न्हयथनादिसें भाषा, संस्कृति, कला, सम्पदायात पुस्तान्तरण यायेगु खःसा थुकथंया पाठ्यक्रम तयार यायेमाःगु खँय् नं बः बियादिल ।
समाजया व्यवस्थापक शोभा वज्राचार्यं समाजपाखें याना वयाच्वंगु थीथी गतिविधिया बारे जानकारी बियादीगु ज्याझ्वलय् शाक्य सुरेन नं नुगःखँ तयादीगु खः ।