ग्वंगःबुँइ सुटकेशय् छ्यं मदुगु सीम्ह

येँ (नेपालभाषा टाइम्स) – येँया ग्वँगः बुँया गणेद्यः लिकसं विभत्स हत्या यानाः वांछ्वयाः तःगु अवस्थाय् छम्हेसिया सिम्ह लुइकूगु दु। छगः सुटकेसय्म नू स्यानाः गःपतं क्वय्या ब्वः जक तयाः वांछ्वयाः तःगु अवस्थाय् लूगु खः । उम्ह मनूया छ्यं व तुति धाःसा मेगु झोलाय् तयाः म्ह वांछ्वयातःगु थासं ३०० मिटर तापाक वांछ्वयातःगु लुइकूगु खः ।

म्हिगः सुथय् स्थानीय वासिन्दा नारायणमान खड्गीं ट्याक्सी व कार दिकातःगु दथुइ लाका सुटकेश वांछ्वयातःगु खनेवं प्रहरीयात खबर याःगु खः । सुटकेशया लिक्क वनाः स्वयेगु झ्वलय् हि खनेदयेवं खड्गीं १०० नम्बरय् फोन यानाः प्रहरीयात जानकारी याकूगु खः । थःम्हं खबर यायेवं प्रहरीया छम्ह हवल्दार वःगु व थः व हवल्दार मिले जुयाः सुटकेश चायेका स्वयाबलय् छ्यं व तुति मदुगु अवस्थाय् मनूया सीम्ह सुटकेश दुने तयातःगु खनागु खँ वय्कलं कनादीगु दु। थ्व लिपा हवल्दारं थः स्वयां च्वय्या निकाययात जानकारी याकूगु खः । प्रहरीं न्हापा म्ह जक बरामद याःगु खःसा वयां लिपा प्रहरी प्रधान कार्यालयं खिचा हयाः मायेकेगु झ्वलय् छ्यं व तुति दुगु झोला नं लुइकूगु खः ।

म्हिगः हे प्रहरीं शव पोस्टमार्टमया निंतिं शिक्षण अस्पताल महाराजगञ्जय् छ्वयेधुंकूगु दु। मदुम्हेसिया पहिचान मजूनिगु खँ नं प्रहरीं धाःगु दु ।