छत्रपाति निःशुल्क चिकित्सालययात आर्थिक ग्वाहालि

येँ – येँ महानगरपालिका वडा नं. १७ छत्रपातिइ च्वंगु छत्रपाति निःशुल्क चिकित्सालययात जर्मनीइ च्वनाच्वंपिं नेपाःमितय् छगू पुचलं आर्थिक ग्वाहालि याःगु दु । चिकित्सालययात जर्मनीस्थित नेपाःमितय् संगठन नेपाल परिवारपाखें न्यागू लख आर्थिक ग्वाहालि याःगु खः ।

कोरोना संक्रमण रोकथाम, नियन्त्रण व उपचारलिसें मानव जीवनया रक्षा व जोखिमपूर्ण अवस्थायात न्यूनीकरणया निंतिं जर्मनीया नेपाल परिवारं चिकित्सालययात उगु आर्थिक ग्वाहालि याःगु खः । संस्थाया नेपाः प्रतिनिधि सुरेन्द्र डंगोलं चिकित्सालयया प्रतिनिधि कुमारदेव मानन्धरयात उगु आर्थिक ग्वाहालि लःल्हानादीगु खः ।

संस्थापाखें बिउगु जानकारीकथं चिकित्सालयय् अक्सिजन प्लान्ट स्थापनाया निंतिं उगु आर्थिक ग्वाहालि याःगु खः ।