नेपालभाषाया संकिपा घोषकया शुभमुहूर्त
येँ – बुद्धकालीन ऐतिहासिक बाखंया लिधंसाय् दयेकेत्यंगु नेपालभाषाया संकिपा घोषकया शुभमुहूर्त याःगु दु । संकिपाया निर्माता रोशन वज्राचार्यया सभापतित्वय् जूगु ज्याझ्वलय् मूपाहांकथं चारुमति विहारया प्रमुख भिक्षु तपस्सी धम्म बिज्याःगु खःसा विशेष पाहांकथं लुम्बिनी विकास कोषया पुलांम्ह उपाध्यक्ष भिक्षु निग्रोध बिज्याःगु खः ।
शीलप्रार्थनालिसें त्वाःदेवाय् मत च्याकाः न्ह्याःगु ज्याझ्वलय् संकिपाया मेम्ह निर्माता मय्जु प्रेमा शाक्यं लसकुस यानादीगु खःसा घोषक संकिपाया बाखं च्वमि नापं बौद्ध विद्वान धर्मरत्न शाक्य ‘ऋषि’, पटकथा च्वमि दर्शनवीर शाक्य, संकिपाया निर्देशक अमृतचन्द्र श्रेष्ठं नं घोषक संकिपया विषययात कयाः नुगःखँ तयादीगु खः ।
अथे हे ज्याझ्वलय् पाहांकथं झायादीपिं वरिष्ठ फोटोग्राफर राजभाइ सुवाल, सिने पत्रकार विजयरत्न असंबरे, नेपालभाषा संकिया ख्यःया नांजाःम्ह निर्देशक सुरेन्दं्र तुलाधरपिंसं संकिपा निर्माण लगायतया थीथी पक्षयात कयाः थःथःगु नुगःखँ प्वंकादीगु खः ।
थनया नेपाः ब्यांक्वेटय् जूगु छगू ज्याझ्वःया दथुइ नांजाःम्ह छायाँकार गौरीशंकर धुँजुं क्यामराया स्वीच अन यानादीगु खःसा वरिष्ठ फोटोग्राफर राजभाई सुवालं क्लाय्प बियादीगु खः । अथे हे नेपालभाषा संकिया ख्यःया नांजाःम्ह निर्देशक सुरेन्द्र तुलाधरं नैंक्याः तछ्यानादिल ।
चिराग फिल्मस् प्रोडक्सन प्रा.लि.या ब्यानरय् दयेकेत्यंगु थुगु संकिपाया बाखंच्वमिलिसें परिकल्पनाकार धर्मरत्न शाक्य ‘ऋषि’ खःसा निर्देशन अमृतचन्द्र श्रेष्ठं यानादी । संकिपाया पटकथा दर्शनवीर शाक्यं च्वयादीगु खःसा छायांकन रवि साय्मिं यानादी ।
संकिपाय् राजेन्द्रमान शाक्य, प्रेमा शाक्य, किशोर चिपालु, राजु महर्जन, अंजली शाक्य, पल्पसा डंगोल, अन्नपूर्णेश्वरी श्रेष्ठ, देवचन्द्र वज्राचार्य, राजाराम भाम, भिमसेन रिसाल, उदेन न्हूसाय्मि, मानकृष्ण वावा, सरस्वति मानन्धर, कंचन तुलाधर, प्रकाश वज्राचार्य, दीपा शाक्य, अष्टमाया महर्जन लगायत आपालं कलाकारया भूमिका दइ ।
मेगु वालंनिसें संकिपाया शुटिंग शुरु यायेगुकथं तयारी जुयाच्वंगु निर्देशक श्रेष्ठं ‘नेपालभाषा टाइम्स’यात जानकारी बियादीगु दु ।
LEAVE YOUR COMMENTS