‘मेलम्ची वइगु अझं लिबाइ तिनि’

येँ (नेपालभाषा टाइम्स) – स्वनिगलय् मेलम्चीया लः वइगु अझं लिबाइगु जूगु दु । स्वनिगलय् लः हयेगु निंतिं म्हूगु सुरुङया परीक्षणया झ्वलय् छुं ई न्ह्यव दुर्घटना जुइधुंकाः आः जुयाच्वंगु थीथी प्राविधिक परीक्षणया कारणं आः चैत पाखे जक स्वनिगलय् लः हयेफइगु खँ धाःगु दु ।

मेलम्ची विकास समितिया सूचना अधिकारी राजेन्द्र पन्तं राससलिसे खँल्हासें मेलम्चीं लः हयेगु निंतिं म्हूगु सुरुङया ९९ प्रतिशत ज्या क्वचायेधुंकूगु थीथी चरणया प्राविधिक परीक्षण जुयाच्वंगुलिं चैतया अन्तिम पाखे जक स्वनिगलय् लः हयेफइगु खँ धयादीगु खः । सुरुङय् लः छ्वयेगु झ्वलय् जूगु दुर्घटना लिपा प्राविधिक निरीक्षणया निंतिं जर्मनीपाखें वःपिं प्यम्ह प्राविधिकतय्सं थःपिनिगु अन्तिम प्रतिवेदन मबिउनि । थुपिं प्राविधिकतय्सं डिजाइन स्वयेगु लिसें फुक्क निरीक्षण यायेगु व न्हापाया रिपोर्ट अध्ययन यायेगु ज्या यायेधुंकूगु दु । थ्व प्राविधिकपिंसं प्रतिवेदन बीधुंकाः नेपाली प्राविधिज्ञ व ठेकेदार कम्पनी दथुइ सहलह यानाः जक सुरुबय् लः तयेगु ज्या जुइगु खँ मेलम्ची आयोजनां धाःगु दु ।

सुरुङय् लः जायेकेत जक हे निला बीगु व थ्व लिपा फुक्कं ज्या ठीक जुल धाःसा जक स्वनिगलय् लः छ्वयेगु खँ सूचना अधिकारी पन्तं कनादीगु दु । वंगु असारय् लः तयेगु झ्वलय् तज्याःगु निपा खापा आः भारती कम्पनीं न्हूगु जडान यायेधुंकूगु दु। आः हेलम्बुया अम्बाथानय् च्वंगु मुहानय्हे डबक्स (बाँध) दयेकेगु ज्या ९० प्रतिशत क्वचायेधुंकूगु दु। थन बाँधयाथाय् ताँ नं दयेकेमानीगुलिं नं लः छ्वयाहये लिबाइगु खँ आयोजनां धाःगु दु ।

एसियाली विकास बैंकया ३३अर्ब ऋण ग्वाहालिं २५ दँ न्ह्यवनिसें दयेकाच्वंगु थ्व आयोजनां स्वनिगलय् न्हिं १७ करोड लिटर लः हयेगु लक्ष्य तयातःगु दु ।