सम्पदा पुनःनिर्माणय् येँमनपाया प्राथमिकता

येँ – येँ महानगरपालिकां सम्पदा पुनःनिर्माण व पूर्वाधार विकासयात प्राथमिकता बिउगु दु। येँ महानगर लागा दुनेया तःभुखाचं क्षति जूगु सम्पदा पुनःनिर्माणय् मनपां खास हे ध्यान बियामच्वंगु खँय् व्यापक असन्तुष्टि पिहां वयाच्वंगु इलय् मनपां आः पुरातात्विक महत्वया रानीपुखू नापं विश्व सम्पदाया धलखय् दुथ्यानाच्वंगु सांस्कृतिक, धार्मिक, पुरातात्विक ल्याखं महत्वपूर्ण मरुसतःया पुनःनिर्माणत प्राथमिकता बिउगु खः।

उकिया निंतिं येँ महानगरपालिकां वइगु आर्थिक दँया निंतिं आः नकतिनि सार्वजनिक याःगु बजेटय् उकथंया प्राथमिकता बियातःगु खः। मनपां सार्वजनिक याःगु बजेटय् पूर्वाधारक्षेत्रया निंतिं दकलय् अप्वः बजेट विनियोजन याःगु दु।तःभुखाचं क्षतिग्रस्त धार्मिक, सांस्कृतिक, पुरातात्विक महत्वया सम्पदा पुनःनिर्माण व पूर्वाधारया निंतिं वइगु आर्थिक दँया निंतिं येँ मनपां स्वंगू अर्ब खुगू करोड नीन्यागू लाख तका बजेट विनियोजन याःगु दु।

तःभुखाचं क्षतिग्रस्त सम्पदा मध्ये छगू रानीपुखू पुनःनिर्माणया ज्या न्ह्याकूगु खःसां उकी आधुनिक निर्माण सामग्री प्रयोग जूगु धासें विरोध जुइवं थौंकन्हय् उगु सामग्री चिइकेगु ज्या न्ह्यानाच्वंगु दु।थौंकन्हय् पुनःनिर्माणया ज्या दिनाच्वंगु रानीपुखूया दक्वं आधुनिक निर्माण सामग्री चिइकेगु ज्या क्वचायेवं हाकनं पुनःनिर्माण प्रक्रिया न्ह्याकीगु जुयाच्वंगु दु।

अथे हे मरुसतः पुनःनिर्माणया निंतिं लछि न्ह्यः हे क्षमा पुजा सिधये धुंकूगु दुसा थौंकन्हय् आवश्यक निर्माण सामग्री चूलाकेगु ज्या जुयाच्वंगु दु। मरुसतः पुनःनिर्माणया निंतिं जनस्तरं गठन यानातःगु मरुसतः पुनःनिर्माण समितियाकथं वइगु निला लिपा मरुसतः पुनःनिर्माणया ज्या शुरु जुइ।

येँ मनपां पूर्वाधार विकासपाखे सम्पदा, प्रदूषण नियन्त्रण, धः व्यवस्थापन, सुविधा सम्पन्न सतक व्यवस्थापन व स्तरोन्नति यायेगु व व्यवस्थित यातायात संचालनया निंतिं अप्वः बजेट विनियोजन याःगु दु। थुकथं हे देय्या पुलांगु स्कुल मध्ये छगू दरवार हाइस्कुलया पुनःनिर्माण, आधुनिक फ्लाइओभर निर्माणयात नं येँ मनपां प्राथमिकत बिउगु दु।

थ्व हे झ्वलय् वातावरण व विपद् व्यवस्थापनय् जल उत्पन्न प्रकोप, जलवायु परिवर्तन, जलाधार क्षेत्रया संरक्षण, फोहर व्यवस्थापन, ल्याण्डफिल साइट व्यवस्थापन थेंज्याःगु थीथी क्षेत्रय् नं ज्या न्ह्याकेगु योजना येँ मनपां न्ह्यःने हःगु दु।

सम्बन्धित बुखँ

LEAVE YOUR COMMENTS