संघीयता अःखः लिहां वनाच्वन
खारेज जुइधुंकूगु क्षेत्रीय व जिल्ला कार्यालय हानं चालु
येँ – देय् संघीय प्रणालीइ प्रवेश जुयाः प्रदेश सरकारया गठन समेत जुइधुंकाः जनतायात सेवा प्रदान यायेगु ज्या व्यवस्थित याये मफयाः हानं पुलांगु हे प्रशासनिक संरचना म्वाका हयेगु ज्याय् संघीय सरकारत लगे जूगु दु । देय् संघीयताय् वनेधुंकाः प्रदेश व स्थानीय सरकार गठन जुइवं न्हापा अस्तित्वय् कायम दुगु क्षेत्रीय व जिल्लास्तरया सरकारी ज्याकूत फुक्क खारेज याना छ्वःगु खः ।
थ्व ज्याकू खारेज यायेधुंकाः क्षेत्रीयया कर्मचारीत प्रदेश सरकारय् व जिल्लाया कर्मचारीत स्थानीय सरकारय् समायोजन याना छ्वःगु खः । तर थ्व क्षेत्रीय व जिल्ला कार्यालयतय्सं यानाच्वंगु ज्यायात प्रदेश व स्थानीय सरकारं बांलाक व्यवस्थापन याये मफुगु कारणं आः वहे खारेज जुइधुंकूगु क्षेत्रीय व जिल्ला कार्यालयतय्त हे पुनर्जीवित यायेगु ज्याय् प्रदेश सरकारत लगे जूगु खः ।
थौंकन्हय् प्रदेश नम्बर ७ या प्रदेश सरकारं जिल्ला जिल्लाय् हानं ज्याकू पलिस्था यायेगु ज्या धमाधम न्ह्याका हयाच्वंगु दुसा मेमेगु प्रदेशय् नं आः थुकथंया हे तयारी जुयाच्वंगु खँ धाःगु दु । सम्बद्ध प्रदेश सरकारतय्सं धाः कथं आः खारेज हे जुइधुंकूगु खःसां थ्व संरचनातय्त हानं मम्वाकेगु खःसा जनतायात बीमाःगु सेवा बीत हे थाकुइगु सम्भावना दु ।
उकिं देशय् प्रणाली न्ह्यागु हे जूसां थथे यायेगु बाहेक आः मेगु विकल्प मदुगु दावी उमिसं याःगु दु ।तर संघीयता सम्बन्धी विज्ञतय्सं धाःसा क्षेत्रीय व जिल्लास्तरया थ्व ज्याकूत हानं चायेकल धाःसा प्रदेश व स्थानीय निकायलय् हानं निगू निगू कथंया सरकार सञ्चालन जुइ फइगु खँ धाःगु दु । थुकिं दोहोरोपन खने दइगु व निगू निकाय दथुइ टक्कर खने दइगु खँ नं उमिसं धाःगु दु ।
लिसें थुकिं यानाः संघीयता हानं लिखतं लिहां वनीगु दावी नं याःगु दु । प्रदेश सरकारतय्सं याना हःगु थ्व ज्यायात गाउँपालिका महासंघं आपत्ति प्वंका हःगु दु ।
७ नम्बरय् पत्रिका च्याकल
प्रदेश नम्बर ७ या राजधानी सारे यानाः जंगल दुने यंकेत्यन धासें उकिया विरोधय् समाचार च्वःपिं कान्तिपुर, नागरिक व अन्नपूर्ण पोष्ट न्हिपौ म्हिगः अन च्याकेगु ज्या यात । आः राजधानी तयेगु धकाः प्रस्तावित गोदावरी नगरपालिका जंगल दुने मलाःगु व थ्व पत्रिकातय्सं मखुगु समाचार च्वःगु धासें धनगढीइ पत्रिका च्याकेगु ज्या याःगु खः । लिसें प्रदेश सरकारं राजधानी सारे यायेगु निर्णय यायेवं सक्रिय जूपिं जग्गा दलालतय्सं नं निर्णय विरुद्ध च्वःपिं सञ्चार माध्यमतय्त ब्वः बिया हःगु दु ।
LEAVE YOUR COMMENTS