नाना पाटेकरयात यौन दुव्र्यहार याःगु द्वपं

बलिउडया पुलांम्ह अभिनेत्री तनुश्री दत्तां लोकंह्वाःम्ह कलाकार नाना पाटेकरं थःत छगू फिल्मया शुटिङ्गया झ्वलय् यौन शोषण याःगु द्वपं बिउगु दु । तनुश्रीं नं सन् २००९ य् रिलिज जूगु ‘हर्न ओके प्लिज’ नांया फिल्मया सुटिङ्गया झ्वलय् यौन शोषण याःगु द्वपं बिउगु खः ।
अभिनेत्री तनुश्रीया थ्व द्वपंयात कयाः बलिउडया ततःधंपिं कलाकारत धाःसा निगू धार बिभाजित जूवंगु दु ।

‘सत्य मेव जयते’ थेंज्याःगु कार्यक्रम यानाः अधिकारया खँ ल्हानाजूम्ह आमिर खान निसें अमिताभ बच्चन, सलमान खानं थ्व मामिलाय् छुं न्ववायेत अस्वीकार याःगु दुसा प्रियंका चोपडा, फरहान अख्तर, सोनम कपुर, ट्विंकल खन्ना, स्वरा भास्कर, रिचा चढ्डा अनुराग कश्यप थेंज्याःपिं कलाकारत खुल्ला रुपं तनुश्रीया पक्षय् वःगु दु ।

तनुश्रीं बिउगु द्वपंयात कयाः नाना पाटेकरं धाःसा आःतक छुं न्ववाःगु मदुनि । थ्व घटनाया इलय् सुटिङ्गस्थलय् दुम्ह छम्ह पत्रकार जेनिसं ट्विट यानाः उबलय् थःम्हं खंगु घटनाया जानकारी बिउगु दु । जेनिसं ट्विटय् च्वःगु दु, ‘सन्२००८ य् टिभी पत्रकार कथं जि हर्न ओके प्लीजया सेटय् थ्यंगु खः । अन जिं तनुश्री तसकं हीमी चायाः च्वनाच्वंगु खना ।

नाना पाटेकर व गणेश आचार्य खँ ल्हानाच्वन । छुं ई लिपा सुटिङ्ग जुल । शट्स बीधुंकाः तनुश्री दुथाय् नाना पाटेकर वन । छुं ई लिपा तनुश्रीं अन वन । सुटिंङ्ग हाकनं सुरु जुल । तनुश्री भेटिनी भ्यानय् च्वंवन । भचा जायेका पुलिस वल । जिं नाना पाटेकरं धयाच्वंगु ताल, ‘जिमि म्ह्याय् थें खः…’ । थ्वयां छुं ई लिपा तनुश्रीया छेँजःपिं वल, वयागु कारय् आक्रमण नं जुल ….।’तनुश्रीया समर्थन यानाच्वंपिं बलिउडकर्मीतय्सं पत्रकार जेनिसां धाःगु खँ सत्य जूगु धयाच्वंगु दु ।