छक्वलं १६ गू अक्सिजन प्लान्ट
येँ – ÷देशय् अभाव जुयाच्वंगु अक्सिजन आपूर्तिया लागिं आः सरकारं न्हूगु अक्सिजन प्लान्ट दयेकाच्वनेगु सिबें नं तयारी हे जुयाच्वंगु प्लान्ट झिके यानाः उत्पादन शुरु यायेगु बिचाः न्ह्यःने हःगु खँ सीदुगु दु ।
अक्सिजन उत्पादन याइगु तयारी अवस्थाया प्लान्ट हयेगु लागिं छगू निजी कम्पनीयात जिम्मा बीत्यंगु खँ नं सीदुगु दु ।
विशिष्ट सूत्रं धाःकथं आः सरकारं फ्रान्सया अक्सि प्लस नांगु कम्पनीपाखें छक्वलं १६ गू प्लान्ट झिके यायेगु तयारी यानाच्वंगु दु । थ्व छगः प्लान्टपाखें न्हिं ४० सिलिण्डर अक्सिजन उत्पादन यायेगु क्षमता दु । यदि थ्व १६ गू हे प्लान्टं पूरा उत्पादन शुरु यात धाःसा न्हिं ६४० सिलिण्डर अक्सिजन उत्पादन जुइ । थुलि अक्सिजन उत्पादन यायेफत धाःसा थुकिं नेपालय् आः जुयाच्वंगु अक्सिजन अभावयात पूर्ति याइगु जक मखु कि भविष्यय् समेत अक्सिजनया अभाव म्हो याये फइगु खँ धाःगु दु ।
सरकारं थ्व १७ गुलिं प्लान्ट अर्डर याःगुयां निवाःया दुने नेपाः थ्यंके हये फइ कथंया तयारी यानाच्वंगु खँ नं धाःगु दु । नेपाः थ्यंकाः छवाः तकया दुने जडान याये सिधयेकाः वयां लिपा उत्पादन हे शुरु याइगु खँ धाःगु दु । प्लान्टयात माःगु सामान जहाजं महसें विमान हे चार्टर यानाः हयेगु बिचाः यानाच्वंगु खँ नं धाःगु दु ।
फ्रान्सया थ्वहे कम्पनीं नेपाःया टिचिङ अस्पतालय् नं अक्सिजन प्लान्ट जडान याःगु खः ।
अस्पतालय् मिशिन दु, उत्पादन मदु
नेपाःया थीथी अस्पतालय् दयेकातःगु अक्सिजन प्लान्ट थौंकन्हय् स्यनाच्वंगु कारणं अस्पतालतय्सं विरामीयात अक्सिजन तकं बी फयाच्वंगु मदु । थौंकन्हय् अस्पताल भर्ना याइपिं विरामीतय्सं थःत माःगु अक्सिजन थःपिंसं हे ज्वना वने माःगु अवस्था जुयाच्वंगु दु । अक्सिजन ज्वना मवन धाःसा अस्पतालं उकिया जिम्मेवारी मकाइगु खँ धाःगु दु ।
नेपाःया अस्पतालत मध्ये दकलय् अप्वः अक्सिजन उत्पादन याइगु टिचिङ अस्पताल खः । अनं न्हिं २००० लिटर अक्सिजन उत्पादन याइगु स्वंगः मिशिन दु । तर थौंकन्हय् निगः स्यनाः छगलं न्हि ५०० लिटर जक उत्पादन जुयाच्वंगु दु । स्यनाच्वंगु मिशिन दयेकेगु लागिं आवश्यक सामान धाःसा लकडाउनं यानाः नेपाः हये मफयाच्वंगु खँ धाःगु दु ।
LEAVE YOUR COMMENTS