कुमारी माजुयात घोडाजात्राय् बिमज्याकीगु

येँ – थुगुसी पाहाँचह्रेया घोडाजात्रा क्यनेगु निंतिं कुमारी माजुयात बिमज्याकीगु जूगु दु । इन्द्रजात्रा व्वस्थापन समितिपाखें थौं छगू विज्ञप्ति जारी यासें कुमारी माजुयात घोडाजात्रा क्यनेगु निंतिं नेपाल वायु सेवा निगमय् मबिज्याकेगु खँ धाःगु खः ।

कोरोना भाइरसया संक्रमण जुइफुगु कारणं यानाः नेपाल सरकारं हूलमूलय् मवनेत धयातःगुलिं कुमारी माजुयात बिज्याकेबलय् हूलमूल जुइफुगु कारणं बिमज्याकेगु निर्णय याःगु खः ।

कुमारी मू पुजारी उद्धव कर्माचार्य, राजगुरु मञ्जुश्री रत्न वज्राचार्य, येँ महानगरपालिका वडा नं. २३ या अध्यक्ष मचाराजा महर्जन, शाक्य महाविहार संघ व बुद्धिजीवीपिनि सल्हा कथं चैत ११ गते जुइगु घोडाजात्रा क्यनेगु निंतिं कुमारीयात मबिज्याकेगु खँ धाःगु खः ।

समितिया नायः व कुमारीया चिताइदार गौतम शाक्यं सही यानाः पितबिउगु विज्ञप्तिइ कुमारी माजुयाथाय् न्हियान्हिथं जुइगु नित्य पुजा बाहेक मेमेगु पुजा व दर्शन नं बन्द यानागु खँ नं धयातःगु दु ।