पेट्रोल ढुवानी सेनायात

येँ – नेपाल आयल निगमं इन्धन ढुवानी यायेत समस्या वल धाःसा सेनाया ग्वाहालि कायेगु खँ धाःगु दु । वंगु न्यान्हु न्ह्यवंनिसें पेट्रोलियम पदार्थ ढुवानी याइपिं चालकतय्सं हडताल यायेवं शुक्रवाः सरकारं सेनायात भारतीय डिपोय् ट्यांकर कायेके छ्वःगु खः । सेनां छ्वयेवं ट्यांकर चालकत थःपिंसं हे ढुवानी यायेत तयार जूगु खँ निगमया निमित्त कार्यकारी निर्देशक सुशील भट्टराईनं कनादिल ।

निगमं शुक्रवाः सुइम्ह सेनायात हवाई जहाजपाखें अमलेखगञ्ज छ्वःगु खः । वय्कलं थ्व आन्दोलनपाखें पाठ सयेकाः आः थज्याःगु समस्या वल धाःसा सेनाया ग्वाहालि कायेगु खँ कनादिल । लिसें आः निगमं हे निसःगु ट्यांकर न्यायेगु खँ नं कनादीगु दु । इन्धन ढुवानी बन्द जूगु खबर वयेवं बिहीवाः व शुक्रवाः स्वनिगलय् पेट्रोल, डिजेल कायेगु निंतिं सवारी चालकत लाइनय् च्वनेमाःगु अवस्था वःगु खःसा शुक्रवाः बहनी हे ५० गः ट्यांकर स्वनिगलय् थ्यनेधुंकूगु जानकारी नं भट्टराई नं बियादीगु दु ।