कन्हसंनिसें पोखराया आकाशय् हटएयर बेलुन

येँ- पोखराया सर्गतय् कन्हसंनिसें हट एयर बेलुन ब्वइगु जूगु दु । कन्हय् छगू ज्याझ्वःया दथुइ गण्डकी प्रदेशया मुख्यमन्त्री पृथ्वी सुब्बा गुरुङ्ग हटएयर बेलुनया उलेज्या यायेधुंकाः व्यवसायी उडान सुरु जुइगु खँ बेलुन नेपालया सचिव प्रवीण महर्जनं कनादीगु दु ।

शुक्रवाः येँय् छगू पत्रकार सम्मेलन यासें सचिव महर्जनं हटएयर बेलुनं पोखराया धम्पुसं उडान यानाः मार्दि खुसि सिथय् अवतरण याइगु जानकारी बियादिल । शाहसिक पर्यटनया निंतिं लोकंह्वाःगु पोखरा नगरीइ हटएयर बेलुनं थ्व व्यवसायय् अझ तिबः बीगु विश्वास प्वंकादिसें सचिव महर्जन थःपिंसं पर्यटन वर्ष २०२० य् विदेशी पर्यटकत नेपाः दुत हयेगु निंतिं नं विशेष प्रवद्र्धन ज्याझ्वः यायेगु खँ कनादिल । वय्कलं बेलुन पाखें हे स्काइ जम्प व बन्जि जम्प याकेगु निंतिं नं थःपिंसं तयारी यानाच्वनागु खँ नं कनादिल ।

धम्पुसं घौछि उडानया निंतिं छम्ह यात्रुयाके ११००० तका वा १६० डलर शुल्क काइ । नागरिक उड्डयन मन्त्रालयया स्वीकृति कथं जमीन स्वयां ५०० मिटर च्वय् तक ब्वयेदइगु बेलुनय् च्वनाः अन्नपूर्ण रेञ्जया फुक्क हिमाल लिसें फेवाताल बांलाक स्वयेखनी ।

अनुभवी पाइलटपाखें ब्वयेकीगु बेलुन पूर्ण सुरक्षित जुइगु खँ बेलुन नेपालं धाःगु दु । अमेरिकां लाइसेन्स कयातःम्ह, बेलुन ब्वयेकेगु ज्याय् गुदँया अनुभव दयेधुंकूम्ह पाइलट बेलुन ब्वयेकीगु खँ धाःगु दु । न्हियान्हिथं बेलुन ब्वयेकेबलय् प्राविधिक रुपं फुक्क चेकजाँच यानाः ब्वयेकेगु खँ कनादिसें सचिव महर्जनं कथांकदाचित दुर्घटनाया निंतिं छम्ह यात्रुया २० हजार डलरया बीमा यानातयागु खँ कनादीगु दु ।