गणेश सहश्रनाम पुजा क्वचाल

येँ -तिकिझ्याः वाःपौया ग्वसालय् न्हापांखुसी गणेश सहश्रनाम पुजा म्हीगः तःजिक क्वचाल । थनया मरु गणेद्यःयात पुजा यानाः कुमारिया रथ चाःहिकीगु क्वःनेया लँपुचाःहिलाः शान्ति निकुञ्ज मा.वि. भौक्यबय् द्वःछि व च्याम्ह मस्तय्त पुजा याःगु खः । ज्ञानीराजा वज्राचार्यया निर्देशनय् जूगु पुजाय् न्याम्ह गुरुजुपिंसहित न्यागू हे पुचः दयेकाः मस्तय् पुजा जूगु खः ।

तिकिझ्याः वाःपौया प्रकाशन संस्था नेवाः मिडिया प्रा.लि.या नायः सन्तकुमार महर्जनया नेतृत्वय् पुजा जूगु खःसा पुजा संयोजन वाःपौया व्यवस्थापक विजयलाल डंगोलं यानादीगु खः । पुजा सुथां लाकेगु निंतिं थीथी खलःपुचःपाखें ग्वाहालि याःगु खः ।

पुजा न्ह्यः जूगु ¥यालीइ मरुत्वाः, ओन्दे ल्याय्म्ह धिमे पुचः, किलाघः सांस्कृतिक पुचः, ह्यूमत त्वाः, तुकंबहाः लगायतया सांस्कृतिक पुचः व त्वालं धिमय् बाँसुरी बाजंलिसें ब्वति काःगु खः । तिकिझ्याः वाःपौ नेपालभाषा व संस्कृति संरक्षणया निंतिं पिदंगु वाःपौ जूगु सम्पादक रत्नकाजी महर्जनं कनादिल ।