जोशीयात महाभियोग तइगु ?

येँ -पुलांम्ह कार्यवाहक प्रधानन्यायाधीशया लिसें सर्वोच्च अदालतया न्यायाधीश दीपकराज जोशीयात महाअभियोग तयेगु कथं तयारी जुयाच्वंगु खँ सीदुगु दु । न्यायाधीश जोशीयात चीन भ्रमणय् वनाच्वंम्ह नेकपा अध्यक्ष पुष्पकमल दाहाल ‘प्रचण्ड’ चीनं लिहां वयेवं महाअभियोग तयेगु तयारी जुयाच्वंगु खँ सूत्रं धाःगु दु । सरकार लिसे भद्र सहमति यानाः सर्वोच्च अदालत लिहां वःम्ह जोशीं धमाधम थीथी मुद्दाया सुनुवाई यायेवं भद्र सहमति त्वाःथःगु धासें नेकपां महाअभियोग तयेगुपाखे बिचाः याःगु खः ।

जोशीं अदालतय् लिहां वयेधुंकाः छगू निगू मुद्दा स्वयां राजीनामा बीगु कथं सहमति याःगु खःसा आः राजीनामा बीगुपाखे छुं हे संकेत मबीवं महाअभियोग तयेत्यंगु खः । प्रधानन्यायाधीश जुइगु निंतिं सिफारिस जुइधुंकाः जोशीयात संसदीय सुनुवाई समितिं अस्वीकृत याःगु खःसा संसदीय सुनवाई समितिं अस्वीकृत याःम्ह न्यायाधीशयात मुद्दा स्वयेगु जिम्मा बीगु ज्यां वर्तमान सरकारयात नं न्ह्यसः चिं ब्वलनेगु अवस्था वःगुलिं थुकथं महाअभियोग प्रक्रिया न्ह्याकेत पार्टी बाध्य जूगु खँ सूत्रं धाःगु दु ।

जोशी सर्वोच्च अदालतया वरिष्ठ न्यायाधीश जूगुलिं न्याय परिषद् बैठकय् ब्वति काये दइसा संवैधानिक इजलासय् नं वरिष्ठ न्यायाधीशया हैसियतं च्वने दइ । लिसें वर्तमान प्रधानन्यायाधीश ओमप्रकाश मिश्र विदेश भ्रमणय् वनीगु इलय् नं कार्यवाहक चले याइगु जूगुलिं नं नेकपां जोशीयात याकनं हे सर्वोच्च अदालतं विदा बीगु तयारी यानाच्वंगु सूत्रया दावी दु ।
जोशीं राजीनामा मयाःगुया लिउने कांग्रेसया साथ दुगु खः लाकि धकाः नं आशंका ब्वलनाच्वंगु दु ।