येँया सतकय् लिकाये–तये याये जिउगु ताँ

येँ – न्यासि वनीपिं अप्वः दइगु थासय् येँ महानगरपालिकां लिकाये–तये याये जिउगु ताँ दयेकीगु जूगु दु । तत्कालया निंतिं मनपां चाबही व माइतीघर मण्डलाय् उगु ताँ दयेकेगु तयारी यानाच्वंगु दु । लिकयाः हानं मेथाय् तये जिउगु उगु ताँ दयेकेगु निंतिं मनपां १२ करोड तकाया बजेट फ्याना तयेधुंकूगु दु ।

मनपाय् थ्वहे छठ पर्व लिपा ताँ दयेकेत बोलपत्र आह्वान यायेगु तयारी जुयाच्वंगु दु । जनघनत्व अप्वः दुगु मेमेगु थासय् नं थज्याःगु ताँ दयेकेगु बारे बिचाः जुयाच्वंगु खँ मनपां धाःगु दु । मनपां येँय् जक च्यागू थासय् अज्याःगु ताँ दयेकेत्यंगु खः ।

मनपां आकाशे ताँ दयेकेगु सम्भावित थाय्या रुपय् टेकु भन्सार, त्रिपुरेश्वर, माइतीघर, बबरमहल, पुतलीसतक, महाराजगञ्ज, कोटेश्वर व गौशालायात ल्ययातःगु दु । थुकिं यातायात व्यवस्थापनय् ग्वाहालि जुइगु खँ धाःगु दु । न्हू बानेश्वरय् ताँ दयेकेगु वा मदयेकेगु बारे छुं निर्णय धाःसा मजूनि ।

न्हू बानेश्वर लागाय् प्रतिनिधिसभा भवन दुगुलिं अन सुरक्षा खतरा जुइ फइगु धासें आकाशे ताँ मदयेकुसें सव–वे दयेकेगु बारे मनपां योजना दयेकाच्वंगु दु । न्हूबानेश्वर अप्वः ट्राफिक समस्या जुइगु थाय् खः लिसें अन जनघनत्व अप्वः दुगुलिं लँ क्रस याइपिं नं अप्वः दु ।