कञ्चनपुर लिपा पोखराय् नं बलात्कार लिपा हत्या ?

येँ – कञ्चनपुरय् पासाया छेँनं थःगु छेँय् लिहां वयाच्वंगु इलय् लँय् हे बलात्कार लिपा हत्या जूगु घटना चर्चाय् वयाच्वंगु इलय् पोखराय् नं स्कूलं छेँय् लिहां वयाच्वंगु इलय् बेपत्ता जूम्ह छम्ह मिसामचायात स्यानाः वांछ्वया तःगु लुइकूगु दु । पोखरा महानगरपालिकाया १९ वडा लामाचौरया १३ दँ दुम्ह पुष्पा केसीया शव लामाचौर फापरतरोय् च्वंगु शैलजा स्मृति पार्कया झालय् लुइकूगु खः ।

स्थानीय वासिन्दां बलात्कार लिपा पुष्पाया हत्या जूगु आशंका याःगु दु । स्थानीय वासिन्दाया कथं मदुम्ह केसीं फिनातःगु स्कर्ट सीम्ह दुगु थासं ३ निसें ४ मिटर उखे लुइगु खः । अथेहें यौनांगं हिं बाः वयाच्वंगु व उकियात पनेत प्याड छ्यलातःगु लूगु दु । घटनास्थलया प्रकृति स्वयेबलय् थ्व नं बलात्कार लिपा हत्या जूगु खनेदु धाःगु दु ।

कास्की प्रहरीया प्रवक्ता डीएसपी रविन्द्रमान गुरुङं पुष्पाया म्हया पिने छुं कथंया घाःखू खनेमदुगु खँ धाःगु दु । पोष्टमार्टमया रिपोर्ट मवयेकं छुं धाये मफइगु खँ प्रहरीं धाःगु दु । पुष्पा विन्ध्यवासिनी माविइ खुगूगु तगिमय् ब्वनाच्वंम्ह खः । बिहीवाः स्कुल बसं छेँय् लिहां वयाच्वंगु इलय् गोलभेडा न्याये धकाः वंम्ह पुष्पा छेँय् लिहां मवः ।

शुक्रवाः नं स्कुल मवनेवं वया बारे न्यनेकने शुरु जूगु खः । माला वनेगु झ्वलय् झालय् शव लूगु खः । पुष्पाया अबु नृतेन्द्र नेपाल प्रहरीया पुलांम्ह हवल्दार खःसा गण्डकी बोर्डिङ स्कुल लामाचौरय् सुरक्षा गार्ड कथं ज्या यानाच्वंम्ह खः ।

उखे कञ्चनपुरय् १३ दँ दुम्ह निर्मला पन्तया बलात्कार लिपा हत्याया काण्ड जूगु इलय् अन हे दुम्ह प्रहरीया एसपी डिल्लीराज बिष्टयात निलम्बन यायेगु लागिं गृह मन्त्रालयं प्रहरी हेडक्वार्टरयात निर्देशन बिउगु दु । निर्मला हत्या काण्डय् अनुसन्धान यायेत सुरुंनिसें अनाकानी यानाच्वंगु धासें स्थानीय जनतां आक्रोश प्वंकेवं मन्त्रालयं वयात निलम्बनया निर्देशन बिउगु खः ।

स्थानीय जनतां थ्व प्रकरणय् एसपी बिष्टया कायया समेत ल्हाः दु धकाः आशंका यायेवं घटनाया अनुसन्धान न्ह्यःने न्ह्याकेत बिष्टं आनकानी याःगु आशंका याःगु दु । घटनाया विरोधय् जूगु प्रदर्शनय् गोली चले जूबलय् छम्ह मचाया ज्यान वंगु दु ।

सम्बन्धित बुखँ

LEAVE YOUR COMMENTS