वरिष्ठ वकिलतय् निशाना आः प्रधानमन्त्री मखु राष्ट्रपति

येँ – वरिष्ठ अधिवक्ता शम्भु थापां प्रतिनिधिसभाय् मवँसे विश्वासया मत सुनां कायेफइ वा सुनां मफ मखु धकाः राष्ट्रपतिं धाये मजिउगु जिकिर यानादीगु दु । प्रतिनिधिसभा विघटन विरुद्ध मुद्दाया बहस यायेगु झ्वलय् वय्कलं उगु खँ धयादीगु खः । कांग्रेसया सभापति शेरबहादुर देउवा सहित १४६ म्ह सांसदया रिट निवेदनय् बहस यासें अधिवक्ता थापां न्ह्यसः थनादिल, ‘प्रतिनिधिसभाय् मवँसे फलानां विश्वासया मत काये फइ वा फलानां काये फइ मखु धकाः राष्ट्रपतिं गुकथं धाये फइ ?’

वय्कलं राष्ट्रपतिं प्रतिनिधिसभाया बैठक सःताः सुयागु पक्षय् सदनया विश्वास दु धकाः परीक्षण याकेमाःथाय् अथे मयासें प्रतिनिधिसभा विघटन याःगु पाय्छि मजूगु दावी नं यानादिल । संविधानया धारा ७६ उपधारा ३ कथं प्रधानमन्त्रीं स्वीन्हुया दुने विश्वासया मत कायेमाःगुली अथे मयाःगुलिं प्रधानमन्त्री पद रिक्त जुइमाःगु खः धासें वय्कलं धयादिल, ‘विश्वासया मत स्वीन्हुया दुने कायेमाः । विश्वासया मत मकाःम्ह मनू प्रधानमन्त्री जुइमखु, विश्वासया मत काये मफुसा पदं मुक्त जुइ ।’
उकथं हे वय्कलं संविधानया धारा ५ या सरकारय् दावी नं यायेगु अले संसदय् मवनेगु धकाः न्ह्यसः नं तयादीगु दु । अधिवक्ता थापां रिट निवेदनयात कयाः अन्तरिम आदेश जारी यायेमाःगु माग नं यानादीगुु दु ।

उकथं हे बहस यायेगु झ्वलय् मेम्ह वरिष्ठ अधिवक्ता महादेव यादवं राष्ट्रपति विद्यादेवी भण्डारीं दुराशय तयाः केपी ओली बाहेक मेपिनि नेतृत्वय् सरकार गठन याये मफयेक पंगः थंगु द्वपं बियादिल । ओली बाहेक मेपिनि नेतृत्वय् सरकार दयेके फइगु अवस्था दुगुलिं हे राष्ट्रपति भण्डारीं अज्याःगु पलाः छिउगु खँ नं वय्कलं धयादिल ।

वरिष्ठ अधिवक्ता यादवं प्रतिनिधिसभाया बहुमत सदस्यतय्सं सरकार गठन यायेगु निंतिं हस्ताक्षर यायेधुंकूगु अवस्थाय् प्रतिनिधिसभां हे निर्णय यायेमाःगु बिचाः नं तयादीगु दु । वय्कलं धयादिल, ‘सरकार गठन मजूगु मखु, राष्ट्रपतिं हे सरकार गठन याके मबिउगु खः । थ्व राष्ट्रपतिया दुराशय खः ।’

‘न्यायाधीश बिसिकेगु कुतः मजुइमा’
येँ -प्रतिनिधिसभा विघटनया मुद्दाय्संवैधानिक इजलासया न्यायाधीशपिं बिसिउँ वनेमाःगु अवस्था मवयेमा धकाः बेञ्चं सचेत याकूगु दु । संसद भंगया मुद्दा बारे म्हिगः निसें न्ह्याःगु सुनवाईया सुरुवात यासें न्यायाधीश ईश्वरप्रसाद खतिवडां रिट निवेदक व विपक्षीयात अथे सचेत यानादीगु खः ।

वय्कलं धयादिल, ‘थ्व विवादया झ्वलय् यक्व अनुभव जुइधुंकूगु दु । यक्व अनुभव दु, न्हूु अनुभव जूगु दु, जिमिसं धायेमाःगु विशेषाधिकार नं माक्व दु, संविधानतः संवैधानिक इजलासय् प्रधानन्यायाधीशया विकल्प मदु, इजलासया ल्यं दुपिं न्यायाधीशपिं सकलें छगः हे नांचाय् दु, आः झी न्ह्याः वने, जिमित बिसिकेगु कुतः गनं नं मजु्इमा ।’

सम्बन्धित बुखँ

LEAVE YOUR COMMENTS