निर्वाचन आयोग विरुद्ध ठाकुरया रिट

येँ -जसपाया विवाद ज्यंकेगु निर्वाचन आयोगया निर्णय पनेमाः धासें अध्यक्ष महन्थ ठाकुर सर्वोच्च अदालत वंगु दु । निर्वाचन आयोगं आधिकारिक जसपा सु खः धकाः निर्णय यायेत साउन ११ गते केन्द्रीय कार्यकारिणी समितिया दुजःतय्गु सनाखत यायेगु धायेवं ठाकुर पुचः सर्वोच्च अदालत वंगु खः ।

सर्वोच्चय् ठाकुरं निर्वाचन आयोग व अध्यक्ष उपेन्द्र यादव विरुद्ध रिट तयादीगु खः । निर्वाचन आयोगं आधिकारिकता सम्बन्धी विवाद ज्यंकल धाःसा उकिं थःपिंत क्षति जुइ धासें उकियात पनेत माग याःगु खः ।

ठाकुरया रिटय् जनता समाजवादी पार्टीया हिलाबुला सहितया केन्द्रीय कार्यकारिणी समितियात अद्यावधिक मयासे विवाद निरुपण यायेबलय् थप जूपिं केन्द्रीय कार्यकारिणी समिति लगायत थुगु पार्टीया केन्द्रीय नेतृत्वया प्रयोजन हे मदइगु जूगुलिं अथे मयायेत माग यानातःगु दु ।

उकथं हे रिट निवेदनय् ठाकुरं निर्वाचन आयोग व अध्यक्ष यादवया क्रियाकलापं जसपा व थःत प्रतिकूल लिच्वः लाःगु खँ नं न्ह्यथनातःगु दु । निर्वाचन आयोगं थःपिनि पार्टीया विवाद ज्यंकेत बिहिवाः याःगु निर्णय बदर यायेत नं माग याःगु दुसा अध्यक्ष उपेन्द्र यादवया एकल हस्ताक्षर दुगु असार ४ गतेया दाबी गैरकानुनी जूगु दाबी नं यानातःगु दु ।
जसपाया ठाकुर व यादव निगुलिं पुचलं प्रधानमन्त्री शेर बहादुर देउवाया सरकारयात समर्थन यायेवं आः थ्व निगू पार्टी हानं छथाय् च्वनीगु खः लाकि धकाः नं चर्चा जुयाच्वंगु दु । ठाकुर पक्षं पार्टी हानं छथाय् च्वनेगु इच्छा जाहेर यानाच्वंसां यादव पक्षं धाःसा उकी रुची क्यनाच्वंगु मदुनि ।