हेटौंडाय् जग्गाया भाः थहां वन

अस्थायी राजधानी तोके जुइवं जग्गाया कारोवार तीव्र

हेटौंडा – प्रदेश नम्बर ३ या अस्थायी राजधानी तोके जुइवं हेटौंडाय् जग्गाया भाः थहां वंगु दु । भाः थहां वंगुया नापनापं जग्गाया कारोवारय् नं व्यापक चहलपहल सुरु जूगु खँ जग्गा कारोवार याइपिं मनूतय्सं धाःगु दु ।राजधानी तोके जुयाः नवनिर्वाचित सांसदतय् शपथ ग्रहणया ज्या छगू क्वचायेवं जग्गा कारोवार याइपिनि चलखेल नं अप्वया वःगु खः । राजधानी तोके जुइवं थन जग्गाया भाः न्हापा स्वयां पाय्छि निदुगं अप्वये धुंकूगु दु ।

न्हापा धुरं छगू लाख धयाच्वंगु जग्गा आः छक्वलं धुरं निगू लाख थ्यनेधुंकूगु दु ।आःयात जग्गाया ज्या याइपिं मनूतय्सं बांलाःगु थाय् ल्ययेगु सुरु यानाच्वंगु दु । उमिस धाः कथं भाः थहां वनीगु सम्भावना अझ हे दनि । आःयात हेटौंडायात अस्थायी राजधानी तिनि धाःगु दु । कन्हय् मेथाय् राजधानी सारे यात धाःसा समस्या वयेफु धइगु छगू ग्याःचिकु दनि । अथे खःसां आः ३ नम्बर प्रदेशया राजधानी स्थायी रुपं हे हेटौंडाय् च्वनी धइगु खँय् धाःसा हेटौंडावासीत ढुक्क जुयाच्वंगु दु ।

राजधानीयात माःगु भवन व पूर्वाधार मेथाय् मदुगु जुयाः हेटौंडा हे स्थायी राजधानी जुइगु तर्क थनया राजनीतिकर्मी व व्यवसायीतय्सं तयेगु यानाच्वंगु दु ।हेटौंडाय् न्हापा हे दयेका तयेधुंकूगु थीथी कार्यालययात हे आः राजधानीयात माःगु थीथी कार्यालय कथं प्रयोग यानाच्वंगु दु । न्हापा विभाग जुयाच्वंगु भवन आः मन्त्रालय जुइगु स्थिति दु । जग्गाया ज्या याइपिं मनूतय्सं अज्याःगु प्रमुख मन्त्रालयत गन गन जुइफु धकाः पत्ता लगे यायेत स्वयाच्वंगु नं सूत्रया दावी दु ।

जग्गाया भाः थहां वंसां स्वनिगः वा पिने जिल्लाया मनूतय्पाखें धाःसा आः तक जग्गा माग मवःनिगु खँ नं उमिसं धाःगु दु । राजधानी जुइगु हल्ला न्यना वनेवं दाङय् नं जग्गाया भाः ह्वात्त हे थहां वंगु खः । ५ नम्बर प्रदेशया राजधानी जुइ धाःगुलिं दाङय् स्वदुगं तक जग्गाया भाः थहां वंगु खःसा गुलिखे मनूतय्सं बैंकय् त्यासा कयाः समेत जग्गा न्याःगु खः । राजधानी रुपन्देहीइ तयेवं दाङय् जग्गाया भाः हानं कुहां वःगु दु ।

न्हापांगु अधिवेशन माघ १८ गते

३ नम्बर प्रदेशसभाया न्हापांगु अधिवेशन थ्वहे माघ १८ गतेनिसें च्वनेत्यंगु दु । प्रदेश प्रमुख अनुराधा कोइरालां संसद आह्वान यानादीधुंकूगु दु । माघ १८ गते न्हिनय् १ बजे हेटौंडाया शिक्षा निर्देशनालयया हलय् प्रदेशसभाया न्हापांगु अधिवेशन च्वनेगु कथं बैठक आह्वान जूगु खः । प्रदेशसभाया न्हापांगु बैठकं प्रदेशया स्थायी राजधानी व प्रदेशया नां तोके यायेगु ज्या याइ धाःगु दु । लिसें प्रदेश सरकार गठनया ज्या नं न्ह्याकी ।