नेवाः मौलिक शैलीया न्हयखा नमूना छेँ

येँ – थनया छत्रपातिइ च्वंगु जुद्धोदय माध्यमिक विद्यालयया विद्यार्थीतय्सं न्हयखा नेवाः पहःया मौलिक नमूना छेँ दयेकूगु दु । विद्यार्र्थीतय्सं दयेकूगु नेवाः पहःया उगु मौलिक नमूना छेँया वंगु शुक्रवाः विद्यालय प्रांगणय् हे ब्वज्या नं याःगु खः ।

ब्वज्याय् उत्कृष्ट नेवाः नमूना छेँयात विद्यालयया प्रधानाध्यापक लक्ष्मण पौडेलं थीथी शैक्षिक हलज्वलं प्रोत्साहन स्वरुप विद्यार्थीतय्त लःल्हानादीगु खः । विद्यालयया नेपालभाषा स्यनामिपिं सृजना महर्जन, निभा डंगोल, रमा शाक्यया सक्रियताय् अतिरिक्त क्रियाकलाप अन्तर्गत विद्यार्थीतय्सं उगु नमूना छेँ दयेकूगु खः ।

विद्यार्थीतय्सं दयेकूगु नेवाः पहःया मौलिक छेँ प्यतँजाःया खः । विद्यार्थीतय्सं पुलांगु पहःया नेवाः छेँ छ्यलि, मातं, च्वतँ व बइगः यानाः प्यतँजाःया दयेकूगु खः । थःपिंसं दयेकूगु नेवाः पहया नमूना छेँया ब्वज्यालिसें विद्यार्थीतय्सं छेँया बारे जानकारीमूलक विवरण नं बिउगु खः ।