विवादय् कलिउड
प्रियंका कार्की ‘इन्टिमेट सिन’
कलिउडय् थौंया दिनय् दकलय्सकलय् न्ह्यःने लानाच्वंम्ह हिरोइन खः – प्रियंका कार्की । विशेष यानाः छुं नं कथंया विवादय् मवइम्ह धकाः धयातःम्ह प्रिंयका कार्की थ्व वालय् धाःसा बांमलाक हे छगू विवादय् तक्यन । प्रियंकायात विवादय् लाकूगु फिल्म “कथा काठमाडौं” खः । थ्व हे वालय् “कथा काठमाडौं” फिल्मया छपु म्यँे रिलिज जुल ।
अले उगु म्येय् प्रियंका कार्की व प्रमोद अग्रहरी दथुया “इन्टिमेट सिन” खनाः आपाःसिनं म्ये वांन्यात । नेपाली फिल्मय् थुलि उत्तेजक लु आःतक मवःनि धइगु सः नं थ्वल । थुकियाबारे प्रियंका मय्जुं छुं प्रतिक्रिया बिइत स्वःगु खनेमदुनि । शायद थौंकन्हय् अमेरिकाय् वना च्वंगुलिं जक प्रतिक्रिया बिइ मलानाच्वंगु खःला धाइपिं मदुगु नं मखु ।
खँ न्ह्यागु हे जूसां “कथा काठमाडांै”या उगु लु काचाक्क सुनां हे पचे यायेफइगु धाःसा खनेमदु । आः फिल्म सेन्सर बोर्डं छु याइगु खः ? व ला स्वये ल्यं हे दनि । तर थौंकन्हय् युट्युबय् थ्व म्येँया स्वकुमि घौघौपतिकं हे अप्वया वयाच्वंगु दु ।
झन् उकिसनं प्रियंका कार्की मय्जुया छुं न्हि न्ह्यःतिनि आयुष्मान देशराज जोशीलिसे “इन्गेजमेन्ट” जूगु खःसा आकाझाकां जूगु इहिपा क्वःछिना ज्याझ्वः नं चर्चाया विषय जूगु खः । आः प्रियंका कार्कीया थ्व रेकर्ड ब्रेक हट सिन धुंकाः प्रियंका व आयुष्मान दथुया रिलेशनय् छु लिच्वः लाइगु खः धयागु चर्चा नं सुरु जूगु दु ।
शिल्पा पोखरेलया इहिपा
इहिपाया खँय् सदां चर्चाय् वयाच्वनीम्ह फिल्म बन्जाः खः– छविराज ओझा । झिन्यादँ नीदँ न्ह्यः गीताञ्जली नांयाम्ह हिरोइनयात लिथु कथं दुथ्याकूम्ह फिल्म निर्माता छवि ओझां लिपा मेम्ह हिरोइन रेखा थापालिसे नं इहिपा याःगु खः ।
गीताञ्जलीया आत्महत्या लिपा छविया रेखालिसे स्वापू क्वातुगु खः । अले इमि दथुइ इहिपा नं जुल । लिपा वनाः रेखा थापा व छविराज ओझा दथुइ डिभोर्स जुल । डिभोर्स धुंकाः याकः जीवन हना वयाच्वंम्ह छविराजया जीवनय् शिल्पा पोखरेल नांयाम्ह हिरोइनया इण्ट्री जूगु खःसा दँबदँ न्ह्यःनिसें छवि व शिल्पाया स्वापू क्वातुयाच्वंगु खः ।
विशेष यानाः इमिगु छुं नं न्हूगु फिल्म रिलिज न्ह्यःने थ्यनकि उमिसं थःगु इहिपाया स्क्याण्डल पित हयेगु याना वयाच्वंगु दु । इहिपा धाःसा औपचारिक रुपं याःगु खनेमदुनि ।
तर लाबला न्ह्यः छविया पुलांम्ह तिरीमय्जु रेखा थापां छवि व शिल्पा दथुइ निदँ न्ह्यः हे इहिपा जुइधुंकल धकाः न्ववाःबलय् छवि व शिल्पा दथुया इहिपा स्क्याण्डल केवल फय्गं जक खः धइगु साबित जुल । थ्व खँय् शिल्पा मय्जुं धाःसा रेखा थापायात थःपिनिगु इहिपाया खँ पुष्टि जुइगु दसु न्ह्यब्वयेत इनाप याःगु दुसा रेखामय्जुं थुकियात कयाः छुं लिसः बिउगु मदुनि ।
“रोजी” फिल्मया विवाद
निर्देशक निरक पौड्यालं दयेकाच्वंगु “रोजी” नांयागु संकिपायात कया छुं ई न्ह्यः निसें ब्वलना वयाच्वंगु विवादं आःयात दिपाः काःगु दु ।
थ्व संकिपाया घोषणा जूगु न्हिकुन्हु हे थ्व सत्यघटनाया लिधंसाय् निर्माण जुइत्यंगु संकिपा धकाः धाःगु खःसा थथे रोजी नां तयाः सत्यघटना धकाः तकं धाःबलय् न्हापा यलया म्ह्याय्मचा रोजी महर्जनया खुदँ न्हय्दँ न्ह्यः जूगु हत्याकाण्डया पीडित परिवारं थुकिया विरोध याःगु खः ।
पीडित परिवारया विरोध धुंका छझाः चलचित्र विकास बोर्डया रोहबरय् परिवार पक्ष व फिल्म निर्माण पक्ष दथुइ सहलह जुल । अनं लिपा हाकनं चलचित्र विकास बोर्डया रोहबरय् मेगु चरणया सहलह जुयाः न्हापा जूगु सहलह कथं “रोजी” संकिपा निर्माण पक्षं थःपिंसं दयेका च्वनागु संकिपाया बाखं रोजी हत्याकाण्डलिसे ज्वःमलाः धकाः दावी यात ।
अले परिवार पक्षयात फिल्मया बाखं नं न्यंकल । थथे बाखं न्यंके धुंकाः जूगु सहलहय् ज्यापु समाज यलया नायः प्रेम महर्जन्, नेवाः संकिपा समाजया नायः सुरेन्द्र तुलाधर, नांजाःम्ह संकिपा बन्जाः गोपालकाजी कायस्थ, “रोजी” संकिपाया निर्माता मणिकर्ण के.सी., निर्देशक निरक पौड्याल, हिरो प्रदीप खड्काया नापनापं कलाकारपिं पल्पसा डंगोल, प्रकाश श्रेष्ठ व पीडित परिवारया छेँजःपिनिगु उपस्थिति दुगु खः ।
बोर्डया रोहबरय् जूगु सहमति कथं “रोजी” संकिपायात रोजी हत्याकाण्डया बाखनय् दयेकाःगु संकिपा धकाः प्रचार मयायेगु , संकिपाया नां हिलेगु व संकिपाया ज्या क्वचाये धुंकाः सेन्सरय् वने न्ह्यःहे पीडित परिवारयात निं क्यनेगु खँ क्वःछिउगु खःसां आः वयाः फिल्म निर्माण पक्षं उगु सहमतियात हाचां गायाः “रोजी”या हे नामं प्रचार न्ह्याकूगु दु ।
फिल्म ‘रोजी’सत्यघटनाया लिधंसाय् निर्माण जुइत्यंगु संकिपा धकाः धाःगु खःसा थथे रोजी नां तयाः सत्यघटना धकाः तकं धाःबलय् न्हापा यलया म्ह्याय्मचा रोजी महर्जनया खुदँ न्हय्दँ न्ह्यः जूगु हत्याकाण्डया पीडित परिवारं थुकिया विरोध याःगु खः ।
‘रोमियो एन मुना’ या प्रचारय् बिकिनि
थौंकन्हय् विवादय् लानाच्वंगु फिल्म “रोमियो एन मुना” खः । पूर्व मिस नेपाल सृष्टि श्रेष्ठ व विनय श्रेष्ठया लिड रोल दुगु थ्व फिल्मया पब्लिसिटीया झ्वलय् जूगु छगू ज्याझ्वलय् थुकिया हिरो विनय श्रेष्ठं निम्ह टुपिस बिकिनि पुनातःपिं मिस्त ज्वनाः इण्ट्री याःगु खःसा थ्व ज्या मिडियाय् साप हे चर्चित जूगु खः ।
चिकुलाया इलय् जूगु उगु प्रचार ज्याझ्वलय् निम्ह बछि नांगांपिं मिस्तनाप हिरोया इण्ट्रीयात उगु फिल्मया म्येया प्रचार यायेगु निंतिं याःगु खःसां सार्वजनिक सभाय् थुकथं बछिनांगांपिं मिस्त न्ह्यब्वःगुयात कयाः आपाःसिनं कुंखिउँगु खः ।
विनय श्रेष्ठया धापू कथं उगु फिल्मया म्यँेय् अझं अप्वः संख्याय् बिकिनि पुना तःपिं मिस्त दुगु तर प्रचारया झ्वलय् निम्हजक मिसा छ्यःगु खनेदु । आः थथे आपालं मिस्तय्त बछि नांगा यानाः न्ह्यब्वयातःगु उगु म्यँे “रोमिया एन मुना”या निंतिं आकर्षण जुइगु खःला कि विकर्षणया विषय जुइगु खः धइगु लिपा हे जक सीदइ ।
बिकास बोर्डया अध्यक्षया विवाद
चलचित्र बिकास बोर्डया अध्यक्ष पदय् वंगु मंसीरय् तत्कालिन देउवा सरकारं निकिता पौडेलयात नियुक्त यात । निकिता पौडेल धयाम्ह नांजाम्ह फिल्म बन्जाः उद्धब पौडेलया म्ह्याय् खः ।
अले उद्धब पौडेल धइम्ह कमल थापाया राष्ट्रिय प्रजातन्त्र पार्टीइ तःधंगु पदय् दुम्ह जूगुलिं वय्कःया म्ह्याय् निकितायात नं आपाःसिनं राष्ट्रिय प्रजातन्त्र पार्टीलिसे सतिम्ह कथं कयातःगु खः ।
तर वयागु नियुक्ति धाःसा नेपाली कांग्रेस व माओवादीया संयुक्त सरकारया पालय् जुल । वयागु नियुक्ती धइगु सरकारी नियुक्ती मखसे बकायदा दरबन्दी चायेकाः दरखास्त फ्वना उकी दरखास्त तःपिं मध्ये अन्तर्वाता कयाः तिनि नियुक्त याःगु खः ।
थुकथं स्वयेबलय् वयागु नियुक्ति सरकारी नियुक्ति मखुसां के.पी. ओलिया सरकारं देउवा सरकारया नियुक्ति दक्व खारेज यायेगु झ्वलय् निकिता पौडेलयात नं बर्खास्त याःगु खः, तर लिपा थथे बर्खास्त जूपिंसं अदालतपाखें पुनर्बहालिया अन्तरिम आदेश कया हःबलय् निकिता पौडेलं नं व हे लँपु नालाः हाकनं चलचित्र बिकास बोर्डया अध्यक्ष जूवःगु दु ।
निकिता मय्जुया थुकथं बोर्डय् हाकनं बहालि जूबलय् धाःसा वयागु थासय् चलचित्र बिकास बोर्डया अध्यक्ष जुइगु कुतः यानाच्वंपिं शिव श्रेष्ठ व केशव भट्टराई धाःसा वाताहां जूगु दु ।
LEAVE YOUR COMMENTS