गोदामं ल्यापटप खुया यंकूम्ह ज्वन

येँ – गोदामपाखें ल्यापटप खुया यंकूम्ह छम्हेसित प्रहरीं ज्वंगु दु । कार्गोया आयात गोदामपाखें ल्यापटप खुया यंकूम्ह विष्णु अधिकारीयात विहीवाः ज्वंगु खः ।

सिन्धुपाल्चोक थांपाल गाउँपालिका छेँ जुयाः थनया गोकर्णेश्वर नगरपालिका बेशीगामय् च्वना वयाच्वंम्ह अधिकारीयात गोदामपाखें ल्यापटप खुया काःगु द्वपनय् ज्वंगु खः ।

नेपाल पारवहन तथा गोदाम व्यवस्था कम्पनी लिमिटेड, त्रिभुवन अन्तर्राष्ट्रिय विमानस्थल शाखा ज्याकुथिं संचालन यानाच्वंगु कार्गो कम्प्लेक्सया आयात गोदामपाखें ल्यापटप खुया यंकूगु धासें अधिकारीयात प्रहरीं ज्वंगु खः । गोदामपाखें थीथी इलय् यानाः झिंस्वंगः ल्यापटप खुया यंकूगु निवेदन बिउगु खः । उगु निवेदन लिपा महानगरीय अपराध महाशाखापाखें खटे जुया वंगु प्रहरीया पुचलं विमानस्थल सुरक्षा ज्याकूलिसेया समन्वयय्् अधिकारीयात ज्वंगु खः ।

खुया यंकूगु च्यागः ल्यापटप व निगू चार्जरसहित ज्वंम्ह अधिकारीयात चोरी सम्बन्धी कसुरय् अनुसन्धान व कारवाही यायेगु प्रहरीं जानकारी बिउगु दु ।