अवकाश प्राप्त शिक्षक लघुया सम्मान व विदाइ

ख्वप – बागीश्वरी माध्यमिक विद्यालयं अनिवार्य अवकाश कयादीम्ह शिक्षक कृष्णभक्त लघुया छगू ज्याझ्वःया दथुइ सम्मान व विदाई याःगु दु । विद्यालयय् जीवनया ३४ दँ तक शिक्षण पेशाय् संलग्न जुयादीम्ह शिक्षक लघुया सम्मान व विदाई ज्याझ्वः वंगु असार २६ गते जूगु खः ।

विद्यालय व्यवस्थापन समितिया अध्यक्ष रवीन्द्र ज्याख्वं मूपाहांया थासं कठिन व जटिल परिस्थितिइ नं अग्रजतय्सं ल्यंका थकूगु विद्यालययात अझ न्ह्यःने यंकेगु ज्याय् शिक्षक व कर्मचारीतय् भूमिका महत्वपूर्ण जुइ धयादिल । वय्कलं जीवनया उत्तराद्र्धय् दकलय् आत्मसन्तुष्टि व आत्मसम्मान प्राप्त जुइगु शिक्षण पेशा जूगुलिं विद्यालयय् ज्या यानाच्वनीगु इलय् हरेक क्रियाकलापयात शिक्षकतय्सं नमूना दयेकेत मेहनत यायेमाः धयादिल ।

सहप्रधानाध्यापक ज्ञानसागर प्रजापतिं मेमेगु सामुदायिक विद्यालय सुना वनाच्वंगु अवस्थाय् बागीश्वरी विद्यालय न्यना वनाच्वने फुगुलिइ शिक्षक लघुया योगदान अमूल्य जू धासें गुलि ताःहाकःगु ईतक नं वय्कलं यानादीगु सेवापाखें सकसिनं सयेका कायेमाःगु शिक्षा खः धयादिल ।

वय्कलं धयादिल, ‘बागीश्वरीपाखें चित्त बुझे मजूगु खँ बागीश्वरी दुने हे सहलह यानाः सामाधान यायेगु ज्या कृष्णभक्त लघु सरपाखें सयेकेमाःगु आवश्यक जू ।’ज्याझ्वलय् अवकाश प्राप्त शिक्षक लघुं वर्तमान इलय् याःगु हरेक ज्यात भविष्यय् वनाः गौरव जू वनीगु जूगुलिं बागीश्वरीयात अझ सफलताया च्वकाय् थ्यंकेत कुतः यायेत सकल शिक्षक कर्मचारी नापं विद्यार्थीयात इनाप यानादिल ।

विद्यालयया प्रधानाध्यापक कृष्णप्रसाद धन्छाया सभापतित्वय् जूगु ज्याझ्वलय् बागीश्वरी कलेजया प्राचार्य धनकुमार श्रेष्ठ, शिक्षक उकेश सुवाल, मिना प्रजापति, राजन लाखे आदिपिंसं शिक्षक लघुया योगदानयात कयाः चर्चा यानादीगु खः । ज्याझ्वलय् अवकाश प्राप्त शिक्षक लघुयात मूपाहां ज्याख्वं ताम्रपत्र लिसें मतिनाया चिं लःल्हानादीगु खःसा प्रधानाध्यापक धन्छां दोसल्लां न्ययेकादीगु खः ।