पर्व लक्षित अनुगमन संस्थागत यानाः निरन्तरता बीगु
येँ(नेपालभाषा टाइम्स)÷येँ महानगरपालिकां मोहनि, स्वन्ति नखःया इलय् याःगु बजाः अनुगमनयत निरन्तरता बीगु जूगु दु । महानगरं अनुगमनपाखें प्राप्त उपलब्धियात सस्थागत यानाः स्वच्छ बजाःया निंतिं अनुगमनयात निरन्तरता बीगु खँ धाःगु दु ।
येँ महानगरपालिकाया उपप्रमुख सुनिता डंगोल पर्व लक्षित अनुगमनपाखें प्राप्त उपलब्धियात संस्थागत यानाः स्वच्छ बजाः अनुगमनयात नियमित यायेगु खँ धयादीगु दु । बजाः व्यवस्थापन व उपभोक्ता हित संरक्षण समितिया बैठकया अध्यक्षता यानादिसें उपप्रमुख डंगोलं सामानया मू, गुणस्तर, स्वच्छताप्रति उपभोक्ता व व्यवसायी थः हे नं जागरुक जुइमाःगु ई वःगु धयादिल ।
अनुचित व्यापारिक क्रियाकलाप पनेगु व स्वच्छ बजाःया निंतिं सचेतना अभिवृद्धि यायेगु अनुगमनया मुख्य व छगू जक लक्ष्य जूगु वय्कःया धापू दु । आः बजाः अनुगमनयात सचेतना ज्याझ्वःलिसें नापं यंकेमाःगु खँय् नं वय्कलं बः बियादिल ।
प्रमुख प्रशासकीय अधिकृत वसन्त अधिकारीं वासः जन्य वस्तुया मू, उपभोग्य मिति, मिश्रण, विक्रेताया अनुमति लगायतया आपालं विषयय् गुनासो दुगु खँ न्ह्यथनादिल । ‘वासः मीत प्रमाणपत्र काइम्ह छम्ह, वासः मीम्ह मेम्ह’, वय्कलं धयादिल, ‘प्रमाण काःम्ह व्यक्ति प्रमुख कार्यकारी जुइ तर प्रमाण कयामतःम्ह मनू तयाः वासः मियाच्वन धइगु यक्वसिया गुनासो दु । उकिं अनुगमनपाखें यथार्थ चित्र ज्वना वयेमाः ।’
बैठकय् खाद्य पदार्थ नियमन तथा पशुपंछि महाशाखा प्रमुखलिसें निरीक्षण अधिकृत डा. अवधेश झां पर्व लक्षित अनुगमनसम्बन्धी विवरण अद्यावधिक यानादीगु खः ।
बैठकं अनुगमनया प्रगति विवरण व अनुगमनया बारे समस्यायात कयाः हरेक महिनाय् निरीक्षण अधिकृतं समितिया बैडकय् जानकारी बीमाःगु निर्णय नं याःगु दु ।
LEAVE YOUR COMMENTS