बौद्ध दर्शनया आधारय् दयेकी लुम्बिनीया राजधानी
येँ – बुद्धया जन्मभूमि समेत दुथ्याःगु नेपाःया लुम्बिनी प्रदेशया न्हूगु राजधानी सहर बौद्ध दर्शनया मूल्य, मान्यताया आधारय् निर्माण याइगु जूगु दु । लुम्बिनी प्रदेशया राजधानी दाङ जिल्लाया राप्ती उपत्यकाय् तयेगु धकाः अनया सरकारं निर्णय याना तयेधुंकूगु दु । थ्व राजधानी सहर बौद्ध दर्शनया मूल्य, मान्यता कथं शान्त, हरियाली र सुरक्षित जुइक दयेकीगु जूगु दु । प्रदेश राजधानी सहर निर्माण याइबलय् राप्ती खुसिया सभ्यतायात नं ध्यानय् तइगु खँ प्रदेश पूर्वाधार विकास प्राधिकरणं धाःगु दु ।
निर्णय कार्यान्वयनया लागिं प्रदेश सरकारं प्रदेश पूर्वाधार विकास प्राधिकरण गठन यानाः प्रदेशसभा हल निर्माण यायेधुंकूगु दु । थ्वहे वइगु मङ्सिर ४ गतेया चुनावं त्याना वइपिं न्हूपिं सांसदतय्गु बैठक आः थ्वहे न्हूगु सभाहलय् च्वनीगु खँ धाःगु दु । प्रदेशया ११ गू मन्त्रालय मध्ये न्हय्गू मन्त्रालय भवन दयेकेत ठेक्का बीगु तयारी जुयाच्वंगु दु ।
प्रदेश राजधानीया लागि आवश्यक संरचना दयेकेत छगू खर्ब तका दां मालीगु अनुमान यानातःगु खँ प्राधिकरणया प्रमुख कार्यकारी अधिकृत इञ्जिनीयर छविराज पोखरेलं कनादीगु दु । प्यंगू चरण यानाः निर्माण न्ह्याकीगु थ्व सहर तयार जुइत म्होतिं नं २० दँ मालीगु अनुमान यानातःगु दु ।
थ्व राजधानी सहर दाङया राप्ती व गढवा गाउँपालिका एवं अर्घाखाँचीया शीतगङ्गा नगरपालिकाया १४ गू वडाय् विस्तार जुयाच्वंगु दु । थुकिया लागिं स्वंगुलिं पालिकाया ७०० बिघा जग्गा एकीकरण आयोजना मार्फत् कायेगु निर्णय जुइधुंकूगु दु । प्रदेश राजधानी वये अःपुकेत निगू सुरुङ मार्ग नं दयेकी । उकी मध्ये कपिलवस्तु जिल्लाया वनकसवासं दाङया कालाकाटतक करिब ११ किमी ताःहाकःगु सुरुङ मार्ग नं दयेकी ।
सङ्घीयताया मर्म धइगु लिउने लानाच्वंगु भूभागयात विकास यायेगु नं जूगुलिं निगू गाउँपालिका दुगु थ्व क्षेत्र उपयुक्त जुइ धकाः प्रदेशसभां निर्णय याःगु खः । राजधानी सहरयात राप्ती खुसिपाखें सुरक्षित यायेत निखेरं पःखाः दनेगु नं योजना दु ।
थन दुने लाइगु शीतगङ्गा नगरपालिका क्षेत्रय् उच्च अदालत व मेडिकल सिटीया रुपय् विकास यायेगु योजना प्रदेश पूर्वाधार विकास प्राधिकरणं दयेकूगु दु । शितगङ्गा नगरपालिका व गढ्वा गाउँपालिकाय् औद्योगिक क्षेत्र नं निर्माण यायेगु योजना दयेकाच्वंगु दु । थ्व थासय् कृषियोग्य भूमि धाःसा बचे याना तयेगु नीति दु । १०० दँ तक नं प्रदेश राजधानी छुं मजुइकेगु लागिं नं विशेष ग्वसाः जुयाच्वंगु दु ।(रासस)
LEAVE YOUR COMMENTS