
यल – स्वनिगःव्यापी सतक विस्तारपीडित संघर्ष समितिं स्वनिगःया दक्वं स्वीनिगुलिं सतक विस्तारपीडित संघर्ष समितिया पदाधिकारी व दुजःपिनिगु उपस्थितिइ छगू सहलह मुँज्या याःगु दु । वंगु शनिवाः थनया वटुक भैरवय् छगू क्षमा पुजा यासें सतक विस्तार व छुं दिं सर्वोच्चपाखें जारी याःगु पूर्ण पाठयात कयाः सहलह ब्याकूगु खः ।
सहलहया इलय् समितिं स्वनिगःया ऐतिहासिक, सांस्कृतिक, धार्मिक व पुरातात्विक सम्पदा क्षति जुइगु व नष्ट याइगुकथं सतक विस्तार मयायेत खबरदारी याःगु खः । अथे हे छुं दिं न्ह्यः यलया वटुक भैरवं सातदोबाटो तक वनेगु सतक तब्या यायेगु नामय् पःखाः थुगु घटनायात कयाः नं विरोध याःगु दु ।
सर्वोच्च अदालतं थगुने असोज २ गते सतक विस्तारं सम्बन्धय् रिट जारी याःगु खःसा करिब झिला लिपा वंगु असार १२ गते जक उकिया पूर्णपाठ जारी याःगु खः । वंगु असोजय् अदालतं फैसला यायेधुंकाः वंगु वालय् जारी याःगु पूर्णपाठकथं सांस्कृतिक सम्पदाय् क्षति मयायेत माग यानागु संघर्ष समितिया नायः सुमन साय्मिं कनादिल ।
सहलहया इलय् अदालतया पैmसला बमोजिक सतक विकास वा विस्तारया योजना हये न्ह्यः विस्तृत रुपं अध्ययन यायेत, वैकल्पिक व्यवस्था दत्तले उकिया उपयोग यायेत व विकल्प मदुगु अवस्थाय् जग्गा प्राप्ति यानाः सतकया सीम क्वःछीत बिउगु निर्देशनकथं ज्या यायेत नं इनाप याःगु दु ।
अदालतं जारी याःगु पूर्णपाठय् सतक विस्तार यायेत जग्गा काये माःगु अवस्थाय् सहज, सरल, प्रभावकारी व निर्विवाद रुपं जग्गा प्राप्तिया माध्यम वार्ता जूगुलिं सरोकारवाला व सतक विस्तारं पीडित जुइपिं, विज्ञतलिसें वार्ता यानाः जग्गा प्राप्तिया निंतिं पहल यायेगु खँयात प्राथमिकता बीत नापं कानुनकथं जग्गा प्राप्त यानाः सतकया सीमा क्वःछीत, आवासया हकं बञ्चित यायेगु संवेदनशील जूगुलिं विकल्पविहीन अवस्थाय् आवासया सुरक्षित हकयात लिच्वः मलाइकथं, मस्तय् शिक्षाया हकया खँय् नं ध्यान बीत धयातःगु दु ।
थ्व हे झ्वलय् अदालतया पूर्ण पाठ वये धुकां उपत्यका विकास प्राधिकरणं क्षतिपूर्ति काः वा धकाः सार्वजनिक रुपं सुचं जारी याःगु ज्यां अदालतया अवहेलना जूगु नं समितिं ठहर याःगु दु । प्राधिकरणया थुगु पलाखं थःपिं हाकनं अदालतया लुखाय् वनेत बाध्य जुइ धासें अज्याःगु ज्या मयायेत नं समितिं ख्याच्वः बिउगु दु ।
LEAVE YOUR COMMENTS