महाबौद्धं २ प्रतिशतया ल्याखं दिनगन्तीं लाभांस बीगु
येँ – थीथी व्यक्तित्वपिनि हनेज्या व न्हूगु पदाधिकारी ल्ययाः महाबौद्ध बचत तथा ऋण सहकारी संस्थाया झिंन्हय्क्वःगु दँमुँज्या क्वचाःगु दु । सभाया झ्वलय् मू पाहाँ प्रदेश नं. ३ या सांसद केशव स्थापितं बौद्ध विद्वान यज्ञमान पति बज्राचार्य, स्वयम्भू संरक्षण महासमितिया सचिव महेन्द्ररत्न बुद्धाचार्य, २२ वडाया अध्यक्ष चिनीकाजी महर्जन, संकटा बचत तथाऋण सहकारी संसथाया पुलांम्ह अध्यक्ष ईश्वरमान तुलाधर, सुविस्ता बचत तथा ऋण सहकारीया अध्यक्ष किरणकुमार जोशी व समाजसेवी गणपतिलाल श्रेष्ठयात हनेज्या याःगु खः ।
अथेहे ज्याझ्वलय् संस्थाया ज्याथपिं दुजःपिंत नं हनेज्या याःगु खः । सभां प्रमिल स्थापितया अध्यक्षताय् न्हूगु कार्यसमिति नं ल्यःगु दु । न्हूगु कार्यसमितिइ मन्जु बज्राचार्य – उपाध्यक्ष, अनुसुयाँ श्रेष्ठ – कोषाध्यक्ष, राजेश शाक्य – सचिव, जितेन्द्र श्रेष्ठ – सह– सचिव, सुभद्रा डंगोल व मेनका देवी तुलाधरयात दुजलय् ल्यःगु खः । अथेहे लेखा सुपर्यवेक्षण समितिइ रिना मास्के (श्रेष्ठ) – संयोजक, छोरी मैयाँ बज्राचार्य व रिना शाक्य (तुलाधर)यात दुजलय् ल्यःगु खः ।
थ्वयां न्ह्यः जूगु सभाय् अध्यक्ष प्रमिल स्थापितं आर्थिक दँ २०७३÷७४ या वार्षिक प्रतिवेदन व लेखा समिति संयोजक रिना मास्के श्रेष्ठं लेखा प्रतिवेदन न्ह्यब्वयादीगु खः । साधारण सभां सेयर दुजःपिंत प्रति कित्ता २ प्रतिशतया ल्याखं न्हि ल्याखाना नगद लाभांस इनेगु प्रस्ताव नं पारित याःगु खः । अथेहे ७० दं च्वय्यापिं जेष्ठ नागरिक दुजःपिंत दँय् निद्वः दां वासः खर्च बीगु नं क्वःछिउगु खः ।
LEAVE YOUR COMMENTS