मोटरसाइकल लुइकाः थुवाःयात जिम्मा

येँ – ट्राफिक प्रहरीं स्वनिगःया थीथी थासं तंगु मोटरसाइकल लुइकाः सम्बन्धित थुवाःयात लःल्हाना बिउगु दु । महानगरीय ट्राफिक प्रहरी महाशाखां स्वनिगःया थीथी थासं तंगु ३३ गः मोटरसाइकल लुइकाः सम्बन्धित थुवाःयात बुझे याना बिउगु खः ।

महाशाखां न्हूसतक, थँबही, क्षेत्रपाति, कोटेश्वर, पुतलीसतक, न्हूगु बसपार्क, महाराजगंज, कालिमाति, त्रिपुरेश्वर, यल लगायत थीथी थासं मोटरसाइकल तंगु धकाः वःगु निवेदनया लिधंसाय् लूगु मोटरसाइकल सम्बन्धित थुवाःयात बुझे याना बिउगु खः ।

स्वनिगःया व्यस्त बजाः लागाय् पार्किङ यानातःगु थासं हे न्हियान्हिथं दर्जनौ मोटरसाइकल जक मखसे कार तकं तनेगु याना च्वंगु दु । सवारी थुवाःया हे लापरवाहीया कारणं सवारी साधन तनीगु यानाच्वंगु महाशाखां न्ह्यथंगु दु ।