पुनःनिर्मित महाविहारया उलेज्या
यल (नेपालभाषा टाइम्स)÷यल महानगरपालिका ११ वडाया ईखाछेँ त्वालय् च्वंगु नापीचन्द्र महाविहार पुनःनिर्माण लिपा उलेज्या याःगु दु । २०७२ सालया भुखाचं क्षति जूगु महाविहार भारत सरकारया वित्तीय ग्वाहालिइ पुनःनिर्माण याःगु खः ।
यल महानगरपालिकाया प्रमुख चिरिबाबु महर्जन व नेपाःया निंतिं भारतीय राजदूत नविन श्रीवास्तवं वंगु सोमवाः पुनःनिर्मित महाविहारया मंकाःकथं उलेज्या यानादीगु खः । भारत सरकारया वित्तीय ग्वाहालिलिसें कला व सांस्कृतिक सम्पदाया निंतिं भारतीय राष्ट्रिय ट्रस्टया प्राविधिक ग्वाहालि उगु महाविहार पुनःनिर्माण याःगु खः । अथे हे महाविहार पुनःनिर्माणया निंतिं नेपाल सरकार, सहरी विकास मन्त्रालयलिसें सरकार निकायं नं आवश्यक ग्वाहालि याःगु ज्याझ्वलय् जानकारी बिउगु दु ।
ज्याझ्वलय् यल महानगर प्रमुख महर्जनं सम्पदा संरक्षण, मर्मत व पुनःनिर्माणयात अझ तीव्रता बीमाःगु आवश्यक दुगु खँय् बः बियादिसें स्वनिगलय् पुनःनिर्माण जूगु सम्पदामध्ये पिम्बहाः पुखूयात यक्वसिनं ययेकूगु खँ कनादिल ।
भारतीय राजदूत श्रीवास्तवं नेपाःया सांस्कृतिक सम्पदाया रक्षा यायेगु धइगु हे दक्षिण एशियाया सम्पदा रक्षा यायेगु खः धासें थुपिं धार्मिक, सांस्कृतिक धरोहरत दक्षिण एशियाया हे मंकाः धरोहर खः धयादिल ।
भुखाय् लिपा नेपाःया सांस्कृतिक सम्पदा पुनःनिर्माणया निंतिं भारत सरकारं उपलब्ध याकूगु पुनःनिर्माण अनुदान अन्तर्गत स्वंगू करोड न्यय्गू लख लागतय् उगु महाविहार पुनःनिर्माण याःगु खः ।
LEAVE YOUR COMMENTS