सिसडोलया फोहर व्यवस्थापन शुरु

येँ – येँ महानगरपालिकां स्वनिगःया फोहर व्यवस्थापन याना वयाच्वंगु नुवाकोटस्थित सिसडोलय् मुंका तःगु फोहरया अन्तिम व्यवस्थापनया ज्या न्ह्याकूगु दु । निदँया निंतिं धकाः कयातःगु सिसडोलय् वंगु झिंस्वदँ न्ह्यःनिसें स्वनिगःया फोहर व्यवस्थापन याना वयाच्वंगु खः ।

ताःई न्ह्यवंनिसें स्वनिगःया फोहर व्यवस्थापन याना वयाच्वंगु सिसडोलय् च्वंगु फोहर व्यवस्थापन यायेगु ज्या मजुयाच्वंगु अवस्थाय् येँ महानगरपालिकां आः वयाः चां ल्हाकाः अन मुंका तःगु फोहर व्यवस्थापनया लिपांगु चरणया ज्या न्ह्याकूगु खः । येँ महानगरपालिका वातावरण विभागया प्रमुख हरिकुमार श्रेष्ठं सिसडोलय् फोहर व्यवस्थापन यायेत समस्या जुया वःगु व फोहर वायेगु थाय् मदुगुलिं अन मुनाच्वंगु फोहरयात व्यवस्थापन यायेत्यनागु जानकारी बियादिल ।

लिसें वयेकलं सिसडोल स्वयां निगू किलोमिटर च्वय् च्वंगु थाय् बञ्चरे डाँडाय् दीर्घकालीन रुपय् फोहर व्यवस्थापन यायेगु निंतिं निर्माणया ज्या न्ह्यानाच्वंगु नं धयादिल । ‘वइगु प्यलाया दुने दीर्घकालीन रुपय् बञ्चरेडाँडाय् फोहर व्यवस्थापन यायेकथं ज्या न्ह्यानाच्वंगु दु’, वय्कलं धयादिल ।

झिंस्वदँ न्ह्यवंनिसें सिसडोलय् फोहर व्यवस्थापन याना वयाच्वंगुलिं अनया स्थानीयवासी गाक्कं प्रभावित जूगु धासें वय्कलं धयादिल, ‘सिसडोलय् आवंलि फोहर व्यवस्थापन मयायेगु व आः मुनाच्वंगु फोहर स्थानीयवासीयात असर मलाइकथं व्यवस्थापन याना यंकेगु जुइ ।’

झिंस्वदँ न्ह्यवंनिसें फोहर व्यवस्थापन याना वयाच्वंगु सिसडोलय् स्वनिगःया झिंच्यागू स्थानीय तहया फोहर व्यवस्थापन याना वयाच्वंगु दु । स्वनिगलय् न्हिं द्वःछि मेट्रिक टन फोहर उत्पादन जुयाच्वंगु दुसा उकीमध्ये ७५ प्रतिशत फोहर सिसडोलय् व्यवस्थापन याना वयाच्वंगु दु ।

सहरी विकास मन्त्रालयं सिसडोलय् फोहर जायेवं दीर्घकालीन रुपय् फोहर व्यवस्थापन यायेगु ल्याखं उगु थासं निगू किलोमिटर च्वय् लाःगु बञ्चरेडाँडाय् फोहर व्यवस्थापन यायेगुकथं ज्या न्ह्याका वयाच्वंगु दु । मन्त्रालयं बञ्चरेडाँडाय् १५ मिटर तजाःगु बाँध लगायत मेमेगु आवश्यक पूर्वाधारसहितया फोहर व्यवस्थापनया निंतिं ज्या न्ह्याका वयाच्वंगु दु ।