सरकारी बलि बन्द यायेत मुद्दा

येँ – स्वनिगःया थीथी देगः व द्यःयाथाय् सरकारी खर्चं जुइगु बलि बन्द यायेगु लागिं सर्वोच्च अदालतय् मुद्दा लाःगु दु । जनतां हिचःति हायेकाः पुलातःगु करया ध्यबां द्यः लय्तायेकेगु नामय् अवोध पशुपंक्षीया ज्यान कायेगु थेंज्याःगु ज्या छुं नं कथं न्यायिक मजू धासें सरकारं खर्च बियाः याका तःगु सम्पूर्ण बलि बन्द यायेमाःगु माग रिटय् याना तःगु दु ।

थेरवाद बौद्ध दायक केन्द्रीय परिषद् पाखें नायः बखतबहादुर चित्रकारं उगु रिट तयादीगु खः ।अज्याःगु बलिपाखें सरकारी धुकूया दुरुपयोग जुइगु जक मखुसें थुकिं यानाः वातावरण प्रदुषित जुयाः स्वस्थ वातावरणय् म्वायेगु मनूया अधिकार नं हनन् जुइगु दावी नं रिट यानातःगु दु ।

रिटय् धयातःगु दु – गुथि संस्थान अन्तर्गत स्वनिगः व काभ्रे पलाञ्चोक जिल्लाय् जक बलिया रुपय् दँय्दसं १२७२ म्ह दुगु, ६३१ म्ह हँय्, २६७ म्ह म्येय्, ११६ म्ह खा, ७० म्ह थुमा, छम्ह च्वलेय्, छम्ह फा, छम्ह बँदेल, छम्ह खसी व स्वम्ह च्याङ्ग्रा यानाः मुक्कं २३६७ म्ह पशुपंक्षीया बलि बीगु यानाच्वंगु दु ।

थ्व फुक्क बलि राज्यया कोषं वनीगु ध्यबापाखें सञ्चालन जुयाच्वंगु खः । थुकिया ल्याःचाः यानाः स्वयेबलय् दँय् करिब १ करोड २५ लाख तका दां राज्यं बलिया लागिं खर्च यानाच्वंगु दु ।

अथे हे मोहनिया इलय् जक राज्य कोषया ध्यबां दुगु व म्येय् यानाः ३२४ म्ह चौपायाया बलि बीगु ज्या जुयाच्वंगु दु । थुकिया ल्याःचाः नं करिब २५ लाख ति थ्यं । राज्यया कोष थज्याःगु ज्याय् खर्च मयासे जनताया कल्याण जुइगु ज्याय् खर्च यायेमाःगु जिकिर यासें बलि रोके यायेत अन्तरिम आदेश बीमाःगु माग नं रिटय् यानातःगु दु ।