सरकारी यातायात कम्पनी अलपत्रय्

येँ – सरकारं स्वनिगलय् संचालनय् हयेत्यंगु यातायात कम्पनी अलपत्रय् लाःगु दु । सरकारीस्तरं स्वनिगःया सर्वसाधारण यात्रुयात सुलभ, सहज व विश्सनीय नगर यातायात सेवा बीगु ल्याखं यातायात कम्पनी चायेकेगु तयारी याःगु खः । संघीय मामिला तथा स्थानीय विकास मन्त्रालयया सक्रियता व येँ महागनरपालिकाया नेतृत्वय् उकथंया यातायात कम्पनी संचालन यानाः सेवा बीगु तयारी याःगु खः ।

खतुं उगु कम्पनी थनिं दछि न्ह्यः माघ महिनाय् हे स्थापना यायेत्यंगु खः । उगु इलय् मन्त्रालयया सक्रियता व येँ मनपाया नेतृत्वय् स्वनिगःया नीनिगुलिं नगरपालिकाया शेयर लगानी यानाः कम्पनी स्थापना यायेगु तयारी याःगु खः । उगु इलय् येँ मनपाया तत्कालीन कार्यकारी अधिकृत तकं जुयाच्वनादीम्ह मन्त्रालयया प्रवक्ता रुद्रसिंह तामाङं कम्पनी चायेकेगु तयारी यानाच्वँच्वं हे देय् न्हूगु संरचनाय् वनाः स्थानीय तहया निर्वाचन तकं जुयाः निर्वाचित जनप्रतिनिधि वःगुलिं उगु ज्या दिउगु धयादीगु दु ।

सरकारीस्तरया उगु यातायात कम्पनीया निंतिं येँ महानगरपालिकां निगू करोड, यल महानगरपालिकां छगू करोड, ख्वप नगरपालिकां ख्वीगू लाख अथे हे किपू, गोकर्णेश्वर, बुढानिलकण्ठ, तोखा, मध्यपुर थिमि, नागार्जुन नगरपालिकां ३५–३५ लाख, सक्व, तारकेश्वर, दक्षिणकाली, कागेश्वरी मनोहरा, गोदावरी, महालक्ष्मी, चाँगुनारायण, चन्द्रागिरि, कार्यविनायक, वज्रवाराही, सूर्यविनायक, महामञ्जुश्री व चाँगुनारायण नगरपालिकाय प्रत्येकं १०–१० लाखया शेयर तयेगु कथं जूगु सहमतिइ तत्कालीन कार्यकारी अधिकृतं ल्हाःचिं तकं तयादीगु खः ।

अथे हे सरकारं वंगु आर्थिक दँय् हे कम्पनीया निंतिं स्वंगू करोड अनुदान नं बिउगु खः । महानगरपालिका व नगरपालिकाया निर्वाचिन नगरप्रमुखं चाहना यात धाःसा तयारी अवस्थाय् दुगु दक्वं भ्वं लःल्हायेत तयार दुगु व उगु इलय् गन थ्यनाच्वंगु खः अनंनिसें हे प्रक्रिया न्ह्याके फइगु तरन्हूगु संरचना कथं मन्त्रालयं कम्पनी चायेके मफइगु प्रवक्ता तामाङं धयादीगु दु । स्वनिगःया यात्रुतय्सं सार्वजनिक सवारी साधनय् कष्टपूर्ण यात्रा यायेत बाध्य जुइवं थगुने साउन महिनाय् स्थानीय तहयात परिचालन यानाः कम्पनी स्थापना यायेत प्रधानमन्त्री नापं मन्त्रिपरिषद्या ज्याकुथिं निर्देशन बिउगु खः ।