अन्तिम इलय् रेडक्रसया महाधिवेशन स्थगित
येँ – नेपाल रेडक्रस सोसाइटी (नेरेसो)या महाधिवशेन व निर्वाचन स्थागित जुइवं देय्न्यंकंया रेडक्रसकःमित मर्माहत जूगु दु । बैशाख २३ गतेनिसें सुनसरी जू वनाच्वंगु नेरेसोया महाधिवेशन छन्हु न्ह्यः जिल्ला प्रशासन ज्याकू, येँपाखें सकतां ज्याझ्वः स्थगित यायेत धासें निर्देशनात्मक पौ बिउगु खः ।
बैशाख २३ निसें २५ तक जुइगु रेडक्रसया महाधिवेशनया निंतिं देय्न्यंकंया रेडक्रसकःमित धरानय् थ्यंकः वयेधुंकूगु, प्रतिनिधिया नां दर्ता यायेगुनिसें निर्वाचनया प्रक्रिया तकं लिपांगु चरणय् थ्यने धुंकूगु व थ्व सम्बन्धय् पत्रकार सम्मेलन तकं जुइधुंकूगु अवस्थाय् आकाझाकां सकता ज्याझ्वः स्थगित यायेमाःगु कारणं सकल रेडक्रसकःमि मर्माहत जूगु खँ धाःगु दु ।
रेडक्रसया संचार विभागया निर्देशक दिव्यराज पौडेलं जारी यानादीगु विज्ञप्तीइ धयातःकथं महाधिवेशनया निंतिं हे धकाः केन्द्रीय ज्यासना पुचःया स्वीम्ह पदाधिकारी व दुजःपिं धरानय् थ्यनेधुंकूगु, निर्वाचनयात विश्वनीय दयेकेगु ल्याखं सकसिगुं छगू हे मतं संस्थाया संस्थापकमध्ये छम्ह व पुलांम्ह अध्यक्ष रमेशकुमार शर्मायात निर्वाचन अधिकारी ल्ययाः निर्वाचनयान प्रक्रिया तकं न्ह्याये धुंकूगु धयातःगु दु ।
संस्थायात जीवन्त तयातयेत, न्हूगु नेतृत्व ल्ययेत व वंगु ५६ दँ न्ह्यवंनिसें मानवीय सेवायात निंतिं संचालन जुयाच्वंगु रेडक्रसयात अझ च्वन्ह्याका यंकेगु ल्याखं जू वनाच्वंगु वैधानिक महाधिवेशन हथासं स्थगित यायेगु तसकं अजू चायापुगु खँ जूगु रेडक्रसं धाःगु दु ।
थ्व हे झ्वलय् येँ जिल्ला प्रशासनं अन्तिम इलय् वयाः महाधिवेशन व निर्वाचन प्रक्रिया दिकेत धासें जारी याःगु निर्देशनात्मक पौया सम्बन्धय् धरानय् उपस्थित केन्द्रीय समितिं गम्भिर सहलह यासें संस्थाया हित व प्रचलिन कानून अःखः पौ वःगु निष्कर्ष पिकाःगु दु । लिसें कानूनी उपचारया निंतिं सम्मानित अदालतय् वनेगु निर्णय नं बैठकं याःगु दु ।
LEAVE YOUR COMMENTS