ने. सं. ११४४ चौलागा अष्टमी -

नेपालय् न्ह्यानाच्वंगु जुजुवादी आन्दोलन, भारतीय हिन्दूत्वया लिच्वः

येँ (नेपालभाषा टाइम्स)- धर्म निरपेक्षताया विरोध यासें नेपाःयात हानं हिन्दू राष्ट्र हे कायम यायेमाः धकाः थौंकन्हय् नेपाःया थीथी थासय् न्ह्यानाच्वंगु आन्दोलन भारतय् दछि लिपा जुइगु संसदीय चुनाव लक्षित दुगु खँ विश्वस्त सूत्रं धाःगु दु ।

सन् २०२४ य् भारतय् जुइगु संसदीय चुनाव त्याकेगु लागिं भारतया सत्तारुढ दल भारतीय जनता पार्टीं हिन्दुत्वया नारायात अझ हे तच्वयेक थ्वयेकेगु तयारी यानाच्वंगु दु । थुकिया लागिं भाजपां भारत दुने जक मखु भारतं पिने नेपालय् तक नं हिन्दूत्वया मुद्दा ल्ह्वनाच्वनागु दु धकाः भारतया हिन्दू मतदातायात प्रभावित यायेत थुकथंया गतिविधि याकाच्वंगु खँ धाःगु दु ।

भारतय् आः जुइगु चुनावय् भाजपां हिन्दूत्वया मुद्दायात अझ हे कडा रुपं ल्ह्वनेगु रणनीति दयेकाच्वंगु दु । भाजपां थः सत्ताय् टिके जुइगु खःसा भारतय् बहुमत संख्याय् दुपिं हिन्दू मतदातायात प्रभावित यायेमाः धइगु राजनीतिक लाइन ज्वनेधुंकूगु दु । उकिं आः जुइगु चुनावय् वर्तमान प्रधानमन्त्री नरेन्द्र मोदी स्वयां नं कडाम्ह नेतायात प्रधानमन्त्रीया रुपय् न्ह्यःने हयेफुगु अनुमान जुयाच्वंगु दु । थुकिया लागिं योगी आदित्यनाथया नां चर्चाय् वयाच्वंगु दु ।

आदित्यनाथ थौंकन्हय् उत्तर प्रदेश राज्यया मुख्यमन्त्री खः । उत्तर प्रदेश भारतया यक्व मतदाता दुगु क्षेत्र जूगु कारणं अन प्रभाव दुम्ह नेतायात न्ह्यःने तल धाःसा चुनाव त्याके फइगु विश्लेषण नं जुयाच्वंगु दु । योगी आदित्यनाथ नेपालय् हिन्दू राष्ट्र जक मखु राजतन्त्र समेत पुनस्र्थापना जुइमाः धाइम्ह खः । पुलांम्ह जुजु ज्ञानेन्द्र शाहं भारतया ‘धार्मिक यात्रा’ याःबलय् आदित्यनाथं वय्कःयात ‘नेपाःया श्री ५ महाराजाधिराज’ धकाः सम्बोधन यानादीगु खः ।

नेपाःया वर्तमान नेतातय्त नं हिन्दू धर्मप्रति आशक्त यायेत भारतं थःगु देशया भ्रमणय् वइपिं नेपाःया प्रधानमन्त्री लिसें मन्त्रीतय्त अनावश्यक रुपं हे भारतया नांजाःगु हिन्दू देगलय् यंकाः पूजा पाठ याकेगु ज्या यानाच्वंगु खँ नं सूत्रं धाःगु दु । भारतं दयेकीगु अज्याःगु भ्रमण ज्याझ्वःयात नेपाः पक्षं अस्वीकृत नं याये मफइगु खँ नं धाःगु दु ।