सी गुघौया लागिं नेपाः वइगु
येँ – अन्ततः चिनियाँ राष्ट्रपति सी जिनपिङ नेपाः भ्रमणय् वइगु जूगु दु । राष्ट्रपति सी थ्वहे वइगु अक्टोबर १५ तारिख कुन्हु नेपाः वइगु खँ धाःगु दु । राष्ट्रपति सी नेपाः वये न्ह्यः भारत भ्रमण याइगु व वयां लिपा नेपालय् गुघौ च्वनाः चीन लिहां वनीगु खँ नेपाःया निंतिं चिनियाँ राजदूतावासं धाःगु दु ।
राष्ट्रपति सी अक्टोबर ११ कुन्हु न्यान्हुया निंतिं भारत भ्रमणय् वनेत्यंगु खः । राष्ट्रपति सीया भ्रमणया तयारीया निंतिं सेप्टेम्बरय् चिनियाँ विदेश मन्त्री वाङ यी नेपाः वइगु खँ धाःगु दु । तर चिनियाँ राष्ट्रपतिया थ्व भ्रमण भारत भ्रमण लिपाया ट्रान्जिट भिजिट जक जुइगु खँ विशेष सूत्रं धाःगु दु ।
सूत्रया कथं थ्व भ्रमणय् नेपाः व चीन दथुइ छुं छुं एजेन्डायात कयाः सहलह जूसां नं उकिया बारे सम्झौता जुइगु सम्भावना धाःसा म्हो जक दुगु खँ धाःगु दु । थ्व स्वयां न्ह्यः नं सीया नेपाः भ्रमण जुइगु खँ धायेगु यानाच्वंसां नं राष्ट्रपति सीया राजकीय भ्रमण धाःसा मजुइगु खँ धाःगु दु ।
नेपालं तःक्वः हे राष्ट्रपति सीया त नेपालय् राजकीय भ्रमण याकेगु कुतः यानाच्वंगु खःसां नं उकियात कयाः चीनं खास हे ध्यान मबियाच्वंगु खँयात कुटनीतिक ख्यलं गम्भीर रुपं कयाच्वंगु दु ।
थ्व स्वयां न्ह्यः चिनियाँ प्रधानमन्त्री वेन जियाबाओं सन् २०१२ य् नेपाः भ्रमण यानादीगु खः । तत्कालीन प्रधानमन्त्री बाबुराम भट्टराई प्रधानमन्त्री जुयाच्वंगु इलय् प्रधानमन्त्री बाओ आकाझाकां केवल न्याघौया लागिं नेपाः झाःगु खः ।
प्रधानमन्त्री नापलायेत छाय् वने त्यन पार्टीया वरिष्ठ नेतात सिंगापुर ?
येँ – सिंगापुरय् वासः याकाच्वंम्ह प्रधानमन्त्री लिसें नेकपाया अध्यक्ष केपी ओलीयात नापलायेगु लागिं नेकपाया उपाध्यक्ष बामदेव गौतम व महासचिव बिष्णु पौडेल सिंगापुर वनीगु जूगु दु । अन उपचाररत प्रधानमन्त्री केपी शर्मा ओलीया स्वास्थ्य अवस्था थुइकेत वय्कःपिं सिंगापुर वनेत्यंगु खः ।
म्हीग जक प्रधानमन्त्री ओलीं थःगु स्वास्थ्य पाय्छि जूगु व आः वइगु शुक्रवाः नेपाः वयेगु खँ ट्विट यानादीगु खः । तर थौ प्रधानमन्त्रीया स्वास्थ्य अवस्था थुइकेत निम्ह वरिष्ठ नेतात उखे वनेत्यंगु कारणं धाःसा थीथी कथंया आशंका ब्वलंका बिउगु दु । प्रधानमन्त्री स्वय्मं हे थःगु स्वास्थ्य स्थिति पाय्छि जू धायेधुंकाः नेता गौतम व महासचिव पौडेल थौं सिंगापुर वनेमाःगु अवस्था छाय् वल धइगु न्ह्यसः सर्वसाधारण दुने ब्वलनाच्वंगु दु ।
नेकपाया केन्द्रीय दुजः सूर्य थापां धाःसा सामाजिक सञ्जालय् थज्याःगु भ्रमणयात नेतातय् चाकडी यायेगु प्रथा धकाः आलोचना यानादीगु दु ।प्रम ओली भदौ ५ गते वासः यायेगु निंतिं सिंगापुर झाःगु खः ।
वय्कःया सिंगापुरय् च्वंगु नेशनल युनिभर्सिटी हस्पिटलय् प्लाज्मा फेरेसिस प्रक्रियां एण्टीबडीया मात्रा म्हो यायेगु वासः जुयाच्वगु दु । प्रम ओली झिंनिदँ न्ह्यः जलस्येँ प्रत्यारोपण याःगु खःसा आः उगु जलस्येँय् समस्या वयेवं वय्कः वासः यायेत हथासं सिंगापुर झाःगु खः ।
LEAVE YOUR COMMENTS