स्वंगू सिटया उपचुनाव नं रोचक जुइगु जुल

येँ (नेपालभाषा टाइम्स)- आः वइगु वैशाखं स्वंगू सिटया लागिं जुइगु उपचुनाव नं रोचक जुइगु सम्भावना खने दया वःगु दु । उपराष्ट्रपति रामसहाय प्रसाद यादवं त्वःतूगु बारा–२ या उपचुनावय् जसपाया उपेन्द्र यादव दनेगु तयारी जुयाच्वंगु दुसा वहे थासय् लोसपापाखें राजेन्द्र महतोयात थनेगु तयारी यानाच्वंगु दु । यादवयात माओवादी सहितया गठबन्धनया साथ दुसा महतोयात जनमत व नाउपां साथ बीगु सम्भावना जुयाच्वंगु दु ।

उखे राष्ट्रपति रामचन्द्र पौडेलं त्वःतूगु तनहुँ–३ चुनाव क्षेत्रय् राष्ट्रिय स्वतन्त्र पार्टीपाखें नांजाःम्ह अर्थशास्त्री डा. स्वर्णिम वाग्लेयात थनीगु चर्चा शुरु जूगु दु । थुकिया लागिं डा. वाग्लें म्हिगः थःगु देउवा व आरजुया निगाहय् च्वने मफु धासें नेपाली कांग्रेस परित्याग यानागु घोषणा यानादीगु दु ।

वंगु चुनावय् कांग्रेसया घोषणापत्र तयार यायेगु ज्याय् मू भूमिका म्हितादीम्ह वाग्लेयात कांग्रेसपाखें गनं नं नियुक्ति मयायेवं वय्कलं पार्टी परित्याग यानागु घोषणा यानादीगु खः । उखे रवि लामिछानें त्वःतूगु चितवनय् कांग्रेसं जितनारायण श्रेष्ठयात थनीगु जूगु दु ।