आइतवाः एमाले–माओवादी एकता संयोजन समितिया बैठक

येँ – एमाले व माओवादी एकताया निंतिं दयेकातःगु संयोजन समितिया बैठक वइगु आइतवाः च्वनीगु जूगु दु । एमाले अध्यक्ष केपी ओली म्हिगः उपचार लिपा बैंकक लिहां वयेवं थौं वय्कःयात नापलायेत झाःम्ह माओवादी अध्यक्ष पुष्पकमल दाहाल दथुइ खँल्हाबल्हा लिपा ७ गते आइतवाः संयोजन समितिया बैठक तयेगु क्वःछिउगु खः ।
ओलीयात स्वयेत वंम्ह प्रचण्ड व ओलीदथुइ ओली निवास बालकोटय् स्वघौ वार्ता जूगु खः । वार्ताय् कार्यदलया प्रतिवेदन, प्रदेश सरकार गठन, राष्ट्रिय सभाया निर्वाचन बारे सहलह जूगु खँ ओलीया प्रेस संयोजक चेतन अधिकारीं धयादीगु दु ।
बैठकय् राष्ट्रिय सभाया निर्वाचनय् मंकाः उम्मेदवार थनेगु, प्रदेश सरकारया गठन, प्रदेश सरकारय् मुख्यमन्त्री, सभामुख जुइपिनि बारे छगू हे धारणा दयेकाः वनेगु बारे सहलह जूगु खः ।
निम्ह नेतातय् दथुइ एकताया निंतिं कन्हय् नं खँल्हाबल्हा जुइत्यंगु दु ।