
येँ (नेपालभाषा टाइम्स)÷राष्ट्रिय स्वतन्त्र पार्टीपाखें कारवाहीलय् लानाच्वंम्ह महामन्त्री मुकुल ढकालं पार्टी सभापति रवि लामिछानेविरुद्ध छानविन जुइमाः कि म्वाः धकाः न्ह्यसः थंगु दु । महामन्त्री ढकालयात बुधवाः न्यंगु स्पष्टीकरणया लिसः बीगु झ्वलय् वय्कलं अःखतं सभापति लामिछानेयात हे कयाः न्ह्यसः थंगु खः ।
थम्हं पार्टीयात हानी नोक्सानी जुइगु छुं नं कथंया ज्या मयानागु स्पष्ट यासें महामन्त्री ढकालं सभापति लामिछानें पार्टी दुने हैकमवादी व निरंकुश शासन यानाच्वंगु द्वपं नं बिउगु दु ।
सभापति लामिछानेयात संवोधन यानाः च्वःगु पतिइ महामन्त्री ढकालं सभापतियात कयाः स्वंगू न्ह्यसः तसें उकिया लिसः नं फ्वंगु दु । सहकारी ठगी मुद्दाय् पार्टीपाखें स्वतन्त्र छानविन समिति छाय् गठन मयायेगु ?, सर्वोच्च अदालतं हे सहकारी ठगी सम्बन्धी छानविन जुइमाःगु फैसला यायेधुंकाः अदालतया फैसला माने यायेगु कि मयायेगु ? व फैसला कथं पार्टी दुने अनुसन्धान याके बीगु कि मबीगु ? धकाः न्ह्यसः तःगु खः ।
सभापति लामिछानें थम्हं छुं गल्ती यानागु मदु उकिं थः विरुद्ध छानविन जुइ फइमखु धकाः मखुगु खँ ल्हाना वयाच्वंगु व उकियात थम्हं नं विश्वास याना वयाच्वनागु धासें महामन्त्री ढकालं वंगु असार २० गते सर्वोच्चया न्यायाधीशपिं सपना प्रधान मल्ल व सारङ्गा सुवेदीया इजलासं सहकारी ठगीइ लामिछानेविरुद्ध नं छानविन जुइमाः धायेधुंकूगुलिं अदालतया फैसला माने यायेगु कि मयायेगु धकाः न्ह्यसः तःगु खः ।
थ्व झ्वलय् महामन्त्री ढकालं थम्हं आःतक सभापतियात मखुगु द्वपं बियागु मदुनि धासें थःत स्पष्टीकरण न्यने न्ह्यः सभापति थः हे नैतिक धरातलय् दुगु पुष्टि यायेफयेकेमाः धाःगु दु ।
LEAVE YOUR COMMENTS