स्वयेबहपिं कासामि – नेयमार व म्यानुयल नुयुर

नेयमार,
फरवार्ड, ब्राजिल

ब्राजिलियन स्ट्राइकर नेयमार विश्वया दकलय् थिकेम्ह कासामि खः । स्पेनिस क्लब बार्सिलोनां फ्रान्सेली क्लब पिएसजी वंबलय् नेयमार विश्वया दकलय् थिकेम्ह कासामि कथं वंगु खः । थुकिं हे सीदु नेयमार गुलि बांलाःम्ह कासामि धयागु खँ । चोटया कारणं स्वलाया आराम लिपा नेयमार विश्वकपया निंतिं तयार दु ।
सन् २०१४ या विश्वकपया सेमिफाइनलय् नेयमार चोटया कारणं म्हितेमफुत । थ्वहे कासाय् जर्मनीं ब्राजिलयात ७–१ गोलं बांमलाक बुकल । थःगु भुमिइ फयेमाःगु थ्व लज्जास्पद पराजय ल्वःमंकाः नेयमार आः ब्राजिलयात खुक्वखुसी विश्वकप जिेता दयेकेगु लक्ष्य ज्वनाः रुस थ्यनाच्वंगु दु ।

म्यानुयल नुयुर,
गोलकिपर, जर्मनी
म्यानुयल नुयर जर्मनीया छम्ह उत्कृष्ट गोलकिपर खः । सन् २००९ निसें सिनियर जर्मनी टिमय् दुथ्याःम्ह नुयरयात विशिष्ट खेलया निंतिं ‘स्वीपर किपर’ धायेगु नं याः । बार्यन म्युनिखया नुयर सन् २०१४य् जर्मनीं विश्वकप त्याकूबलय् नं उगु टिमया छम्ह महत्वपूर्ण दुजः खः । थुबलय् नुयुरं उत्कृष्ट गोलकिपर जुयाः गोल्डेन ग्लोब त्याकूगु खः ।
चोटया कारणं नुयुरं थ्व विश्वकप म्हितेखनी लाकि खनीमखु धयागु अन्योल जुयाच्वंगु खः । थुगु सीजनय् वं बार्यनपाखें प्यंगू जक कासा म्हितल । तर अन्तिम इलय् नुयुरयात विश्वकप टिमय् दुथ्याकल । जर्मनीया कप्तान नुयुर आः विश्वकप उपाधी रक्षा यायेगु लक्ष्यसहित मैदानय् वइ ।