स्वयेबहःपिं स्वम्ह कासामि

पेले अले डिएगो म्याराडोना । थुपिं हे निम्ह कासामि खः, गुम्हेसित विश्व फुटबलय् आःतकया हे दकलय् बांलाःपिं कासामि धाइ । विश्वकपय् थःगु जादुयी प्रदर्शनया कारणं थुपिं थथे जुइफुगु खः । विश्वकप हे अज्याःगु दबू खः, गन सुं छम्हेसित थःत प्रमाणित यायेगु दकलय् बांलाःगु अवसर जुयाच्वनी ।

प्रत्येक विश्वकपय् सुं नं सुं कासामि स्टार जुइ, अले लिपा तकं वयात सकसिनं लुमंकाच्वनी । हाकनं अज्याःपिं कासामि नं दयाच्वनी, गुम्हेसियापाखें यक्वसिनं अपेक्षा यानाच्वंगु दइ, तर छुं याना क्यने फइमखु । विश्वकप अवसर जक मखु, दबाब नं खः । अपेक्षा हे याना मतःम्हेसिनं बांलाक म्हिताः क्यनेफु । विश्वकप २०१८ य् धाथें स्वयेबहपिं ल्याय्म्ह कासामित सु सु जुइफु ले ?

नेयमार (ब्राजिल)
प्यद“ न्ह्यःया विश्वकप नेयमारं ल्वःमंकूगु खइमखु जुइ, गुबलय् वयागु टिम ब्राजिल सेमिफाइनलय् जर्मनीया ल्हातं तसकं बांमलाक बुत । उबलय् हे खः, व तसकं घाःपा नं जूगु । आः नं नेयमार पूर्णतः फिट मदु ।

जुइफु वं थुगुसीया विश्वकप म्हिती । अथवा मम्हिते नं फु । वं म्हितल धाःसा ब्राजिलया निंतिं व हे दकलय् महत्वपूर्ण कासामि जुइ, थुकी शंका मदु । आखिरय् व विश्व फुटबलया दकलय् थिकेम्ह कासामि खः ।

पेरिस सेन्ट जर्मेन (पीएसजी) या निंतिं वं थुगुसीया सिजनय् बांलाक ला म्हितल, तर अन्त्यय् थ्यंकाः घाःपाः नं जुल । प्रतीक्षा यायेबहगु घटना जुइ, यदि व चोटपाखें मुक्त जुयाः मैदानय् कुहां वल धाःसा ।

टोनी क्रुस (जर्मनी)
थुगुसीया विश्वकपया डिफेन्डिङ च्याम्पियन खः जर्मनी । प्यद“ न्ह्यः जर्मनीं उपाधि त्याकूबलय् महत्वपूर्ण योगदान बिउपिं कासामि मध्येय् लाः, टोनी क्रुस ।

आः नं व टिमया उतिकं महत्वपूर्ण कासामि खः । न्ह्यइपुसेच्वंगु ख“ छु धाःसा व नकतिनि २७ द“या जुल, तर वं थ्यंमथ्यं दक्वं त्याकेधुंकूगु दु, जर्मनीया निंतिं जक मखु, थःगु क्लब रियल म्याड्रिडया निंतिं नं ।

अप्वः चर्चाय् वयेगु मयाः, क्रुस । तर मैदानय् वयागु योगदान न्ह्याब्लें चर्चा यायेबहजू । वया मूू भूमिका मिडफिल्डरया खः । जर्मनी न्ह्याबलें तःधंगु च्याम्पियनसिपय् उपाधिया प्रवल दावेदार जुयाच्वनी । कारण ? क्रुस थेंज्याःपिं भलादमिपिं कासामिया कारणं ।

इस्को (स्पेन)
धाइपिंसं धायेगु याना हयेधुंकूगु दु, स्पेन हाकनं उत्कृष्ट लयय् दु । यक्व मखु, छुं द“ न्ह्यः तक स्पेनं विश्व फुटबलय् सनसनी हःगु खः, विश्वकप व युरो झ्वलाक त्याकाः ।

अनंलि स्पेनया प्रदर्शन कुहां वन, प्यद“ न्ह्यःया विश्वकपय् स्पेनया प्रदर्शन ल्वःमंकेबहगु जुल ।तर आः गाक्कं सुधार दु टिमय् । थथे छाय्धाःसा स्पेनयाके इस्को दु ।

थुकिं हे यानाः स्पेन हाकनं छक्वः उपाधिया प्रवल दावेदार दु, अले थः समर्थकतय्त निराश मयायेगु खःसा इस्कों रुसी भूमिइ तसकं बांलाक म्हिते माली । स्पेनया न्हूगु पुस्ताया इस्को बांलाःम्ह कासामि खः, थुकी शंका यायेम्वाः, छाय्धाःसा रियलया लिपांगु सफलताय् वयागु तःधंगु ल्हाः दु ।