विश्वकप पुलुपालु
फिफाया च्वछायेबहगु ज्या
विश्वकप फुटबल नकआउट चरणय् पूर्व विजेता फ्रान्सया निक्वःतकया विजेता व उपाधि दावेदार अर्जेन्टिनायात ४–३ गोलं बुकाः अन्तिम च्यागुलिं दुहां वःगु दु । फ्रान्सया विजयय् केलियन एम्बापे नायक जुल ।
अर्जेन्टिनायात बुकेगु निंतिं महत्वपूर्ण भूमिका म्हितूम्ह नापं कासाया म्यान अफ द म्याच तकं जुइत सफल फ्रान्सया ल्याय्म्ह स्टार कासामि एम्बापें विश्व फुटबलया लिजेन्ड ब्राजिलया पेलेया कीर्तिमानी नाप नं बराबरी याःगु दु । विश्वकपया नकआउट चरणय् निगू गोल याःम्ह फ्रेन्च कासामि एम्बापें पेलेया रेकर्ड नापं बराबरी याःगु खः ।
सन् १९५८ या विश्वकप फुटबलय् मात्र १८ दँया उमेरय् पेलें ब्राजिलया निंतिं खुगू गोल याःगु खः । पेलेया थ्व हे रेकर्डयात बराबरी यायेगु झ्वलय् फ्रेन्च कासामि एम्बापें रुस विश्वकपय् शनिवाः अर्जेन्टिना विरुद्ध जूगु नकआउट चरणया न्हापांगु कासाय् निगू गोल याःगु खः ।
एम्बापें जारी विश्वकपय् स्वंगू गोल यायेधुंकूगु दु ।एम्बापें अर्जेन्टिना विरुद्धया कासाय् ४ मिनेटया अन्तरय् निगू गोल याःगु खः । ६४ औं मिनेटय् न्हापांगु गोल याःम्ह एम्बापें निगूगु गोल ६८ औं मिनेटय् याःगु खः ।
पिज्जाय् कासामि
विश्व फुटबलया महाकुम्भ विश्वकपया आनन्द कासामि व खेलप्रेमीतय्सं जक काइमखु, थुकिया लबः मेमेगु व्यवसाय यानाच्वंपिं नं काइ । थुकी दकलय् न्ह्यःने लाइपिं धइगु होटल, रेष्टुरेन्ट व बार खः ।
थुकिया लिपांगु दसु जुया बिउगु दु रसिया विश्वकप फुटबल । विश्वकप फुटबलं सकसिगुं ध्यान सालाच्वंगु इलय् नसाज्वलंया व्यवसाय याइपिंसं फरक धंगं मनूतय् ध्यान सालेगु कुतः यानाच्वंगु दु ।
थ्व झ्वलय् रसियाया छगू होटलया कुकं छुं छुं चर्चित कासामिया ख्वाः दुगु पिज्जा दयेकाः गाहाकियातय् आकर्षित यानाच्वंगु दु । रसियाया सेन्ट पिटसवर्गय् च्वंगु ‘होपहेड टापरुम बार’या भ्याल्लेरी माक्सिमिचिकं उरुग्वेया स्टार कासामि लुइस स्वारेज व पोर्चुगलया स्टार कासामि क्रिष्टियानो रोनाल्डोया ख्वाःया आकृति वयेक पिज्जा दयेकूगु खः ।
तसकं मेहनत यानाः दयेकूगु उगु पिज्जा दयेकेत निघौलं मल्याक ई काःगु माक्सिमिचिकया धापू दु ।बारय् मुख्य रुपं पिज्जा जक दयेकेगु ज्या याइम्ह माक्सिमिचिकं रसियन प्रशिक्षक स्टानिस्लाभ चर्चेस्लोभ, कासामिपिं आर्टेम डेजुवा, फेडोर स्मोलोभया ख्वाःया आकृति वःगु पिज्जा नं दयेकूगु दुसा यदि रुसं विश्वकप त्याकल धाःसा सकलें कासामिया आकृति वयेक पिज्जा दयेकेगु वयागु योजना दु ।
रोनाल्डोया मिखा भाय्
विश्वकप उपाधि दावेदार अर्जेन्टिना व पोर्चुगल निगुलिं रुस विश्वकपं लिहां वने धुंकूगु दु । वंगु शनिवाः जूगु नकआउट चरणया न्हापांगु कासां अर्जेन्टिना व उकुन्हु हे जूगु मेगु कासां पोर्चगल पिहां वंगु खः ।
निगुलिं टिम पिहां वनेधुंकूसां थ्व निगू टीमया चर्चित कासामियात कयाः रुसया कजान सहरय् अझं चर्चा जुयाच्वंगु दु ।चर्चाया कारणं नकआउट चरणं पिहां वंगुलिं धाःसा मखु ।
उकिया कारण खः रोनाल्डों मिखा भाय् यानाच्वंगु छगू पेन्टिङ । अर्जेन्टिनाया टिम च्वनाच्वंगु कजान सहरया छगू होटलया पिनेसं च्वंगु करिब स्वतँजाःगु भवनया अंगलय् रोनाल्डोया पेन्टिङ तयातःगु दु ।
गुगु पेन्टिङय् रोनाल्डों मिखा भाय् यानाच्वंगु दु । स्वतँ जाःगु होटलया भवनय् छखे जक उकथंया पेन्टिङ च्वयातःगु खः ।न्ह्यइपुगु खँला थ्व दु कि उगु किपा हालसालय् दयेकूगु धाःसा मखु, थगुने रुसय् हे जूगु कन्फेडेरेसन कपया इलय् दयेकूगु खः । उगु इलय् कासा जुइ न्ह्यः व हे होटलय् पोर्चुगलया टीम च्वं वःगु खः । टीमयात लसकुस यायेकथं दयेकातःगु उगु पेन्ट्रिङ आतक नं गथे खः अथे हे दु ।
LEAVE YOUR COMMENTS