प्यला दुने प्रारम्भिक प्रतिवेदन

येँ – येँनं रक्सौल तक स्वाइगु रेल मार्ग दयेकेगु निंतिं प्यला दुने प्रारम्भिक प्रतिवेदन तयार याइगु जूगु दु । थुकिया निंतिं भारतीय रेल विभाग अन्तर्गतया वरिष्ठ इन्जिनियरत येँय् वया ज्या यायेधुंकूगु खँ रेल विभागं धाःगु दु । ‘प्रिलिमिनरी इन्जिनियरिङ एण्ड ट्राफिक सर्भे (पीइटी) धाइगु थ्व प्रतिवेदनं प्रारम्भिक लागतया खाका तयार यायेगु खँ धाःगु दु ।

थ्व प्रतिवेदनया आधारय् विस्तृत परियोजना प्रतिवेदन तयार यायेत नं सहज जुइगु खँ धाःगु दु । उत्तरी सीमावर्ती क्षेत्रं येँ तक रेल हयेगु निंतिं पूर्व सम्भाव्यता अध्ययनया चर्चा जुयाच्वंगु इलय् दक्षिणी छिमेकी नाका रक्सौलं नै येँ तक रेल हयेगु निंतिं प्रारम्भिक अध्ययन सुरु जूगु खः ।

प्रधानमन्त्री केपी ओली भारत भ्रमण वंगु इलय् थ्व रेल भारतीय आर्थिक ग्वाहालिं दयेकेगु सहमति जूगु खः । भारतीय प्रधानमन्त्री नरेन्द्र मोदी नेपाः भ्रमण वःगु इलय् भ्रमण पुचलय् वःपिं निम्ह वरिष्ठ इन्जिनियरतय्सं सम्भावित रेल स्टेशन कथं येँया चोभारय स्थलगत भ्रमण नं याःगु खः ।

उबलय् उमिसं रेलमार्ग अध्ययनया निंतिं नक्सा नं ज्वनावंगु खँ नेपाःया रेल विभागया महानिर्देशक अनन्त आचार्यं धयादीगु दु । वय्कलं भारतीय रेल मन्त्रालयं प्यलाया दुने प्रतिवेदन बुझे यायेत आदेश बियातःगु खँ धयादीगु दु । उमिसं दकलय् न्हापां इन्जिनियरिङ व ट्राफिक सम्बन्धी प्रारम्भिक प्रतिवेदन तयार याइगु खँ महानिर्देशक आचार्यं धयादीगु दु ।

बिबिसी लिसे खँ ल्हासें वय्कलं धयादीगु दु, ‘इन्जिनियरिङ धायेबलय् गज्याःगु सुरुङ मार्ग दयेकेमाली धयागु सामान्य प्रारम्भिक अनुमानया खँ दुथ्याइ, अथेहे रक्सौल निसें वीरगञ्ज तकया ट्राफिक बारे नं उमिसं अध्ययन याइ ।’थज्याःगु अध्ययनं रेलमार्ग दयेकेत गुलि लागत तुइ धयागु अनुमानित हिसाबकिताब पिहां वइगु व उकिया हे आधारय विस्तृत परियोजना प्रतिवेदन दयेकेगु सुरु जुइगु खँ नं वय्कलं धयादीगु दु ।

सम्बन्धित बुखँ

LEAVE YOUR COMMENTS