सिद्धिदासया लुमंतिइ थीथी ज्याझ्वः

येँ – महा–कवि सिद्धिदास महाजुया १५२ दँ बुन्हिया लसताय् थुगुसी थीथी कथंया न्हूगु ज्याझ्वः याइगु जूगु दु । बुन्हिया लसताय् लाकाः महाकवि सिद्धिदासं च्वयादीगु प्रकाशित व अप्रकाशित फुक्क हे सफूयात छथासं मुनाः मंकाः ग्रन्थ पिकायेगु तयारी जुयाच्वंगु दु । येँ महानगरपालिकाया ग्वाहालि कयाः नेपालभाषा केन्द्रीय विभागं ‘सिद्धिमाः’ धइगु नां तयाः थ्व ग्रन्थमाला पिकायेत्यंगु खः ।

महाकवि सिद्धिदासं ५० गू स्वयां अप्वः सफू च्वयादीगु दु । अथे हे येँया भोताहिति फुसय्सं महाकवि सिद्धिदासया झ्वाता दुगु दुवाःयात नं ‘सिद्धि दुवाः’ नां तयेगु लागिं पहल जुयाच्वंगु खँ सीदुगु दु । यँया सिद्धिदास स्मृति समाजपाखें उगु दुवाःयात मेमेगु भासं सिद्धि चोक वा सिद्धि स्क्वायर धाःसां जिउगु कथं येँ महानगरपालिकायात प्रस्ताव तयेत्यंगु खँ सीदुगु दु ।

समाजया हे कुतः कथं अन सिद्धिदासया झ्वाता तयेगु ज्या जूगु खः । थ्वहे झ्वलय् नेपाल प्रज्ञा प्रतिष्ठानं नं थुगुसी महाकवि सिद्धिदास बुन्हिया लसताय् वय्कःया व्यक्तित्व व कृतित्वयात कयाः छगू कार्यशाला गोष्ठी याइगु जूगु दु ।

कंस विहीवाः प्रतिष्ठानया देवकोटा कक्षय् वय्कलं च्वयादीगु छुं कविता पाठया नापं थ्व गोष्ठी जुइगु खँ धाःगु दु । सिद्धिदासया लुमंतिइ न्हापा जुया वयाच्वंगु थीथी ज्याझ्वःत थुगुसी नं यंलागा दुतिया कुन्हु नियमित कथं जुइगु खँ सीदुगु दु ।