मानव अंग प्रत्यारोपण केन्द्रय् ४२५ म्हेसित प्रत्यारोपण सेवा
ख्वप – सहीद धर्मभक्त राष्ट्रिय प्रत्यारोपण केन्द्र (मानव अंग प्रत्यारोपण केन्दं्र) ४२५ म्हेसिया जँलास्येँया सफल प्रत्यारोपण याःगु दु । केन्द्रया आः नकतिनि जूगु खुक्वःगु वार्षिकोत्सवया लसताय् जूगु ज्याझ्वलय् उकिया जानकारी बिउगु खः ।
केन्द्रया कार्यकारी निर्देशक डा. पुकारचन्द्र श्रेष्ठं २०६९ माघ ६ गतेनिसें शुरु जूगु जँलास्येँ प्रत्यारोपण शुरुया दछिया दुने झिंस्वंगः जँलास्येँ सफल प्रत्यारोपण यायेगु ज्या जूगु जानकारी बियादीगु खः ।
शुरुइ झिंस्वम्ह ल्वगिपाखें शुरु जूगु जँलास्येँ प्रत्यारोपण थगुने १३२ म्ह ल्वगिया प्रत्यारोपण यायेगु ज्या जूगु जानकारी बियादिसें वय्कलं धयादिल, ‘थुगु दँया वंगु च्यालाया दुने जक सछि व झिंछम्हेसित प्रत्यारोपण यायेगु ज्या जुइ धुंकूगु दुसा शुरुनिसें आतकया दुने ४२५ म्हेसित जँलास्येँया प्रत्यारोपण सफलतापूर्वक याये धुंगु दु ।’
थुगु दँय् नं निम्हेसित स्येँ प्रत्यारोपण याःगु केन्द्रं आतकया दुने स्वीन्याद्वः स्वयां अप्वः ल्वगियात सेवा बी धुंगु केन्द्रया कार्यकारी निर्देशक श्रेष्ठं जानकारी बियादिल । ‘प्रत्यारोपणय् जँलास्येँ दातापाखे शतप्रतिशत व प्रत्यारोपणपाखे ९८ प्रतिशत सफलता प्राप्त जूगु दु’, वय्कलं धयादिल, ‘थ्व धइगु विश्वया हे उत्कृष्ट सफलता मध्ये छगू खः ।’
केन्द्रं थौंकन्हय् दछिया दुने स्वीद्वःयात डायलोसिस सेवा बिया वयाच्वंगु दु । वय्कलं धयादिल, ‘दछिया दुने स्वीद्वः ल्वगियात डायलोसिस सेवा बिया वयाच्वंगु केन्द्रय् आः थ्व स्वयां अप्वःयात थप सेवा बी फइगु अवस्था मदु । भौतिक संरचना व आवश्यक उपकरण थप जुल धाःसा सेवा नं थप याये फइगु वय्कःया धापू दु । वय्कलं धयादीकथं आः हे नं ४८० जँलास्येँया ल्वगि व ३३१ म्ह ल्वगि डायलोसिसया निंतिं पियाच्वंगु दु ।
LEAVE YOUR COMMENTS