जलवायु परिवर्तनया क्षेत्रय् व्यापक सुधार जुइकथं ज्या यायेत आह्वान

संयुक्त राष्ट्र संघया महासचिव एन्टोनियो गुटेरेसं याकनं व गम्भिर तरिकां विचाः यानाः जलवायु परिवर्तनया क्षेत्रय् आमूल सुधार जुइकथं ज्या यायेत विश्व जगतयात आह्वान यानादीगु दु । स्पनेया राजधानी म्याड्रिडय् वंगु सोमवाःनिसें शुरु जूगु जलवायु परिवर्तनसम्बन्धी संयुक्त राष्ट्र संघीय संरचना महासन्धिया पक्ष राष्ट्रया २५ क्वःगु सम्मेलन (कोप–२५) या उलेज्या सत्रय् नवासें वय्कलं उकथं आह्वान यानादीगु खः ।

महासचिव एन्टोनियो गुटेरेसं जलवायु परिवर्तनया क्षेत्रय् ज्या यायेबलय् विकासशील देय्या अनुकूलन क्षमता अभिवृद्धि जुइकथं आर्थिक वित्त ल्यंकेमाःगु खँय् बः बियादीगु सम्मेलनय् सहभागि वन तथा वातावरण मन्त्रालय, जलवायु परिवर्तन महाशाखा प्रमुख डा. महेश्वर ढकालं जानकारी बियादिल ।

काबर्नया व्यापार सम्बन्धी सहलह यायेबलय् निजी ख्यलं नं लबः काये दइगु व सकसितं मंकाःकथं ज्या याये फइकथं सहलह यायेत नं महासचिव गुटेरेसं इनाप यानादीगु खः । थुगु ख्यःया वैज्ञानिक निकाय ‘इन्टरनेशनल गभर्मेन्टल प्यानल अन क्लाइमेट चेन्ज (आइपीसीसी)या अध्यक्ष होइसुङ लीं हरितगृह ग्यास उत्सर्जन अप्वइगु क्रम जारी जुयाच्वंगु सन्दर्भय् आइपीसीसीया स्वंगू विशेष प्रतिवेदनयात आधार कयाः ज्या यायेमाःगु खँय् बः बियादिल ।

चिलीया राष्ट्रपति सेबास्टियन पिनेरां भिडियो सन्देश बियादिसें पेरिस सम्झौतायात आधार माने यानाः याकनं जलवायु परिवर्तनया ज्याझ्वः कार्यान्वयन यायेमाःगु खँय् बः बियादीगु कोप–२५ या निंतिं नेपाःया सम्पर्क अधिकृततकं जुयाच्वनादीम्ह ढकालं जानकारी बियादिल ।

स्पेनया प्रधानमन्त्री पेड्रो सान्चेजं विगतय् औद्योगिकीकरणय् गुकथं युरोपं नेतृत्वदायी भूमिका म्हितूगु खः, उकथं हे कार्बन उत्सर्जनय् म्होति हयेत नं नेतृत्वदायी भूमिका म्हितेमाःगु खँय् बः बियादिल । उगु इलय् कोप– २४ औं सम्मेलनया अध्यक्षता याःगु पोल्याण्डं चिलीयात अध्यक्षता हस्तान्तरण याःगु खः ।

उलेज्या सत्रलिपा समूहगत सहलहय् जी–७७ व चीन, युरोपियन युनियन, वातावरणीय एकीकृत समूह, छाता समूह, अफ्रिकन समूह, अरब समूह, कम विकसित राष्ट्रतय्गु समुह लगायतं थःथःगु धारणा तयेगु ज्या जूगु खः । जी–७७ व चीनलिसें कम विकसित राष्ट्रतय्गु समूह नेपाःलिसे सम्बन्धित खः ।

जी–७७ व चीनं कार्बनया व्यापार सम्बन्धय् सहलह याःगु इलय् दोहोरो कार्बन ‘क्रेडिट’या गणना मजुइकथं तर अनुकूलनया निंतिं अप्वः स्रोत चूलाके फइकथं न्ह्याः वनेत सुझाव बिउगु मन्त्रालयया सहसचिव ढकालं जानकारी बियादिल ।

थुकथं हे ‘जलवायु परिवर्तनया लिच्वलं क्षति व विनास याःगु सम्बन्धी वार्सा अन्तर्राष्ट्रिय संयन्त्र’या पुनरावलोकन यायेबलय् प्रभावकारी संयन्त्र निर्माण यायेमाःगु खँय् नं बः बिउगु दु । थुकथं प्रभावकारी संयन्त्रया विकास यायेबलय् प्रविधि हस्तान्तरणय् विशेष बः बीत तकं इनाप याःगु दु ।

अति कम विकसित राष्ट्रतय्गु समूहं सन् २०२० या दुने संशोधित राष्ट्रिय योगदान प्रतिवद्धता (एनडीसी) दक्वं राष्ट्रं बुझे यायेमाःगु व विकसित राष्ट्रं एनडीसी बुझे यायेबलय् महत्वकांक्षी जुइमाःगु खँय् बः बिउगु दु । सम्मेलनय् थीथी राष्ट्रं जलवायु परिवर्तनया क्षेत्रय् थःथःगु देशं याःगु बांलाःगु ज्याया प्रचारप्रसार यायेत बिस्कं बिस्कंया ज्याझ्वः नं यागु दु ।

गुकी विकास, क्षमता अभिवृद्धि, अन्तर्राष्ट्रिय सम्बन्ध तयेगु निंतिं अति महत्व सम्पर्क संजाल कथं काये याः । नेपालं छगू ज्याझ्वः डिसेम्बर ७ व मेगु डिसेम्बर ११ य् तःगु दुसा मेगु थीथी देय् व संघ संस्थातय्सं ग्वसाः ग्वःगु ज्याझ्वलय् नं ब्वति कायेगु सहसचिव ढकालं जानकारी बियादिल ।

सन् १९९२ य् स्थापना जुयाः १९७ गू पक्ष राष्ट्र दुगु संयुक्त राष्ट्र संघीय जलवायु परिवर्तन महासन्धि (युएनएफसिसिसी)या २५ क्वःगु सम्मेलन थ्व हे मंसिर १६ गतेनिसें २७ गतेतक स्पेनया राजधानी म्याड्रिडय् जुयाच्वंगु दु ।

जलवायु महासन्धि कार्यान्वयनया प्रमुख आधार क्याटो अभिसन्धि व पेरिस सम्झौता खः । कोप–२५ चिलीया सान्टियागोय् यायेगु क्वःछिनातःगु खःसां अनया राजनीतिक अस्थिरताया कारणं स्पेनया म्याड्रिडय् याःगु खः । सम्मेलनया अध्यक्षता धाःसा चिलीं हे याःगु दु ।

सम्बन्धित बुखँ

LEAVE YOUR COMMENTS