ने. सं. ११४४ ञलाथ्व दशमी -

पर्यटक बसचालक नं मापसे कारवाहीइ

नेपालय् दँय्दसं सलंसःया ल्याखय् सतक दुर्घटनात जुयाच्वनी । थज्याःगु दुर्घटनाय् लानाः द्वलंद्वः मनूया ज्यान वनेगु नापं घाःपाः जुइगु यानाच्वंगु दु । स्वनिगः दुने जक मखु, स्वनिगलं पिहां वनीगु व स्वनिगलय् दुहां वइगु सवारी साधन नं दुर्घटनाय् लानाच्वंगु समाचार वयाच्वनेगु याः । ततःग्वःगु यात्रुवाहक सवारी साधन जक मखसे निजी सवारी साधन नं दुर्घटनाय् लाःगु समाचार न्हियान्हिथं धइथें वयाच्वंगु दइ ।

थज्याःगु दुर्घटनाय् थीथी यातायात कम्पनीया बस दुर्घटनाय् लाःगु समाचार वयाच्वनी, तर पर्यटकत ज्वना वनीगु बस गबलें दुर्घटना जूगु समाचार वःगु मदु । उकिं मेमेगु सवारी साधन चले याइपिंत ट्राफिक प्रहरीं मादक पदार्थ सेवन (मापसे) याःगु दु वा मदु धकाः थाय्थासय् जांच यानाच्वंगु दइ । पर्यटकीय सवारी साधन चले याइपिंत धाःसा गबलें नं उकथं मापसे परीक्षण याःगु खने मदु । तर वंगु जेठ २१ गते येँय् नं पोखरा वनाच्वंगु छगः पर्यटकीय बसयात ट्राफिक प्रहरीं चेकजांच याःगु इलय् उकिया चालकं मापसे याःगु पत्ता लगे जूगु दु ।

वंगु जेठ २१ गते येँय् नं ४० म्ह पर्यटक ज्वनाः पोखराया निंतिं वनाच्वंगु ज १ प १६० नं. या पर्यटक बसया चालकं मापसे याःगुलिं प्रहरीं ज्वंगु दु । अथे हे जेठ २० गते बहनि ८ः१५ ताः इलय् २५ म्ह यात्रु ज्वनाः येँय् नं बाग्लुङ वनेत्यंगु ध १ ख ६१३ नं.या बस कलंकीइ ट्राफिक प्रहरीया कारवाहीलय् लात ।

उकुन्हु हे बहनि ८ ताः इलय् येँय् नं ३५ यात्रु ज्वनाः भैरहवाया निंतिं वनाच्वंगु ना ६ ख १०८० नं. या यात्रुवाहक बस नं कलंकीइ चेकजांच याःगु इलय् प्रहरी कारवाहीलय् लात । जेठ २२ गते सनिलय् ४ः३० ताः इलय् येँय् नं ४० म्ह यात्रु ज्वनाः बाग्लुङ वनेत्यंगु बा ५ ख १५५४ नंया बस नं ट्राफिकया कारवाहीलय् लात ।

उकुन्हु हे सनिलय् ८ः३० ताः इलय् येँय् नं ३० म्ह यात्रु ज्वनाः विराटनगर वनेत्यंगु ना ६ ख १५६१ नंया बसयात नं चेकजांच याःगु इलय् प्रहरीया फन्दाय् लात । थन न्ह्यब्वयागु घटना केबल प्रतिनिधि पात्र जक खः । महानगरीय ट्राफिक प्रहरी महाशाखापाखें खटे जूगु पुचलं थ्व स्वन्हुया दुने न्हय्म्ह रात्रीकालीन बस चालकयात मादक पदार्थ सेवन (मापसे) यानाः सवारी चले याःगु धासें नियन्त्रणय् काःगु दु ।

चालकया लापरवाहीया कारणं जुइगु सवारी दुर्घटनाय् लानाः दँय्दसं द्वलंद्वः यात्रुत दुर्घटनाया शिकार जुइमालाच्वंगु दु । अज्याःगु हे घटनायात मध्यनजर यानाः महानगरीय ट्राफिक प्रहरी महाशाखां रात्रीकालीन बस चालकयात नं जांच यायेगुलिइ कडाइ यानाहःगु खः । महाशाखां नियन्त्रणय् काःपिं रात्रीकालीन बस चालकयात सार्वजनिक मुद्दा चले याःगु दुसा सम्बन्धित समितिं न्हूपिं चालक हयाः यात्रुतय्त गन्तव्यय् तक वनेगु वातावरणतकं मिले याःगु दु ।

महाशाखाया प्रमुखलिसें प्रहरी वरिष्ठ उपरीक्षक बसन्तकुमार पन्तं रात्रीकालीन बस चालकं मापसे यानाः सवारी चले याःगु धइगु खँ वयेवं महाशाखां रात्रीकालीन सवारी साधन चले याइपिंत नं कडा रुपं जांच यानागु धयादी । ‘छम्ह चालकया लापरवाहीया कारणं सु नं यात्रु दुर्घटनाया शिकार जुइ म्वालेमा धइगु जिमिगु प्रमुख लक्ष्य खः’ वयक्लं धयादी । महाशाखां चालु आर्थिक दँया आतकया दुने ७९ रात्रीकालीन बस चालकयात नियन्त्रणय् कयाः कारवाही यायेधुंकूगु दु ।

टुरिष्ट बस एशोसियसन अफ नेपाल (टिवान)या अध्यक्ष प्रल्हाद लोहनीं मापसे यानाः सवारी चले याइपिं पर्यटक बस चालकयात नं कडा कारवाही यायेमाः धयादी । ‘पर्यटक बसं स्वदेशी जक मखसे विदेशी पर्यटक नं कुबीगु जूगुलिं भद्र व नरम जुइमाः, लाक्वपाक्व याइपिं चालकं पर्यटक बस चले याये दइमखु’ वय्कलं धयादी । वय्कलं पर्यटक बस चले यानाः मापसे याइपिं चाकलयात कयाः अनुसन्धान जयाच्वंगु धयादिल ।

थ्व हे झ्वलय् महाशाखां स्वनिगलय् जक चालु आर्थिक दँया वंगु झिलाया अवधि दुने ट्राफिक नियम हाचां गायाः सवारी चले याःपिं स्वंगू लाख न्हय्च्याद्वः ९२७ चालकयात कारवाही याःगु दु । उकीमध्ये मापसे यानाः सवारी चले याःपिं २६,१९७ दु । स्वनिगलय् थौंकन्हय् ४० गू ट्राफिक प्रहरी इकाइपाखें ट्राफिक व्यवस्थापनया ज्या जुया वयाच्वंगु दु । स्वनिगलय् जक ११ लाख स्वयां अप्वः यातायातया साधन चले जुइगु याःसा देय्न्यंकं २७ गू लाख स्वयां अप्वः सवारी साधन दु ।
(रासस)